JERRY OLEA
Nagtabla sina Marietta Subong aka Pokwang (2 Valid IDs) at Ruby Ruiz (Status: Rejected) bilang best actress sa awards night ng Cinemalaya 22: Reel Reflections noong Agosto 17, 2026, Lunes, sa Shangri-La Plaza, Mandaluyong City.
Maging sa takilya ng Cinemalaya 2026 ay pukpukan ang kani-kanyang pelikula.
Topgrosser ang 2 Valid IDs, at pumangalawa ang Status: Raejected.
Ang dalawa pang pumalo sa box-office ng 22nd Cinemalaya ay ang psychological horror na Mag-iina, at ang queer drama na Tayo Lang Ang Nakakaalam.
POKWANG AND RUBY RUIZ's "NORA-VILMA RIVALRY"
Yung “rivalry” nina Pokwang at Ruby sa Cinemalaya 2026 ay inihalintulad sa rivalry nina Vilma Santos at National Artist Nora Aunor.
Vilmanian si Pokwang.
Di ba’t gumanap sila ni Eugene Domingo bilang Vilmanians for All Seasons sa pelikulang D’ Lucky Ones (2006) na tinampukan din nina Sandara Park at Joseph Bitangcol?
Ang unang pelikula ni Ruby ay Bona (MMFF 1980), kung saan gumanap siya bilang younger sister ni Bona (karakter ni Nora).
Matapos ang Cinemalaya awards night, inusisa si Pokwang kung ano ang masasabi niya na inihahambing sila ni Ruby kina Nora at Vilma.
Ang tugon ni Mamang Pokie, “Malayo! Malayo naman! Marami pa kaming kakainin ni Ate Ruby.”
Ipinagtapat ni Pokwang na naging acting coach niya si Ruby.
Ang komento naman ni Ruby sa paghahambing sa kanila ni Pokwang kina Nora at Vilma, “Hindi ba puwedeng Maricel-Sharon?”
Malapit si Ruby kay Maricel Soriano.
Sinuportahan ni Maricel si Ruby sa pelikulang First Light na ipinalabas sa local cinemas noong Hunyo 24, 2026.
Nagbihis at dumalo si Maricel sa gala ng Status: Rejected noong Agosto 9, Linggo ng 8:30 P.M.
Ang sabi ng katotong Ogie Narvaez-Rodriguez, “Hangga’t maaari, hindi lumalabas ng bahay si Maricel pag Sunday. Pero mahal niya talaga niya si Ruby kaya pumunta siya sa gala ng Status: Rejected kahit Sunday night ito.”
Read: Pokwang and Ruby Ruiz: Cinemalaya 2026’s "Nora-Vilma"
NOEL FERRER
Panauhin ang Diamond Star na si Maricel Soriano at ang Eternal Star na si Snooky Serna sa Episode 2 ng limited series na Call My Manager.
Nag-streaming ito sa HBO umpisa Agosto 20, Huwebes.
Ang episode na ito ay idinirek ni Erik Matti, mula sa panulat nina Senedy Que at Jinky Laurel.
Gumanap sina Maricel at Snooky as fictionalized versions of themselves.
MARICEL AND SNOOKY'S NORA-VILMA-INSPIRED RIVALRY
May fierce rivalry sila sa episode, na ang story arc ay inspired ng rivalry nina Superstar Nora Aunor at Star for All Seasons Vilma Santos.
Sa umpisa ng episode ay ni-reenact nila ang mata-sa-mata na confrontation nina Teresita “Tere” Valdez (karakter ni Nora) at Sandra Aragon (karakter ni Vilma) sa ending ng 1978 film na Ikaw Ay Akin na idinirek ni National Artist Ishmael Bernal.
Mala-Vilma si Snooky, samantalang mala-Nora si Maricel, sa pelikula kunwari na "Ang Sa ‘Kin Ay Sa ‘Yo."
Kanta ni Nora ang background sa nasabing eksena.
Sa episode na ito ay tila may reference sa 1995 melodrama film nina Maricel at Snooky na Inagaw Mo Ang Lahat Sa Akin, sa direksyon ni Carlos Siguion-Reyna.
Mistulang may reference din sa 1992 drama film ni Maricel na Ikaw Pa Lang Ang Minahal.
Sa awards season noong 1993 ay naka-grandslam bilang best actress si Lorna Tolentino para sa Narito ang Puso Ko.
At any rate, nag-agawan sina Snooky at Maricel kung sino ang gaganap na Paula sa pagsasapelikula muli ng A Portrait of the Artist as Filipino.
Dahil kay Mother Aleta Alfonso (karakter ni Gina Alajar), na-settle na si Maricel ang gaganap na Paula, at si Snooky ang Candida.
Ang isyu naman ay billing.
Gusto ni Snooky na una siya sa billing dahil mas marami siyang awards, at pinagbigyan na niya si Maricel sa papel na Paula.
Ang hirit naman ni Maricel, siya ang mabango sa takilya, kaya dapat siya ang mauna sa billing.
Ang suggestion ng RM (road manager) na si Camille (ginampanan ni Christiana Zaleta) ay gawing paikot ang mga pangalan nina Maricel at Snooky — walang una, walang huli.
Tapos, may kani-kanya silang solo poster.
Reminiscent iyon ng billing nina Nora at Vilma sa 1982 crime drama na T-Bird at Ako, sa direksiyon ni Danny Zialcita.
Sa Episode 3 ng Call My Manager ay mukhang dadalirutin ang isang sex video scandal.
Ito na ba yung nakakalokang episode na tampok si Direk Laurice Guillen?
Read: Sugarpop member Vanessa Rangadhol dies at 30 after accident
GORGY RULA
For adults only ang Call My Manager. “18+, mature content” ang rating information dito.
Ang logline ng Episode 2, “Three managers must navigate a feud while the company’s future hangs in uncertainty.”
Ang gumanap bilang tatlong manager ay sina Judy Ann Santos, Edu Manzano, at RK Bagatsing.
Regular din sa cast din ng Call My Manager sina Gina Alajar, Christiana Zaleta, Raf Pineda, Kat Galang, at Haley Dizon.
A PORTRAIT OF THE ARTIST
Ang A Portrait of the Artist as Filipino: An Elegy in Three Scenes ay 1950 stage play ni National Artist Nick Joaquin.
Sa 1965 film adaptation ni National Artist Lamberto Avellana, si Daisy Hontiveros-Avellana ang Candida Marasigan, at si Naty Crame-Rogers ang Paula Marasigan.
Sa Tagalog version nito na itinanghal noong Pebrero 1979 sa Fort Santiago, sa direksiyon ni National Artist Lino Brocka, ang Candida ay si Lolita Rodriguez, at ang Paula ay si Charito Solis.
Si Phillip Salvador ang gumanap na Tony Javier.
Marami pang ibang mga aktres ang gumanap sa karakter nina Candida at Paula. Sa MMFF 2017 film na Ang Larawan, ang Candida ay si Joanna Ampil, at ang Paula ay si Rachel Alejandro.
Sa totoong buhay, sa entablado man o pelikula, hindi gumanap sina Nora Aunor, Vilma Santos, Maricel Soriano, at Snooky Serna ng alinmang karakter sa Marasigan sisters na sina Candida at Paula.
Sa 2027 ay may pagsasadula muli ng Larawan, kung saan si Joel Lamangan ang Candido, si Anton Juan ang Paulo, at si Vince Tañada ang Tony Javier.
Between Pokwang and Ruby Ruiz, just in case, sino ang mas bagay na Candida, at sino ang mas angkop na Paula?
Kung tutuusin ay mas coveted ang Candida role, pero in-invert iyon sa Call My Manager at yung Paula role ang pinag-agawan nina Maricel at Snooky.
Sa first two episodes pa lang ng Call My Manager ay andami nang artista ang nag-cameo.
Sa mga susunod na episode ay kaabang-abang kung sinu-sino pang artista ang eeksena, at kung anu-ano pang kaganapan sa showbiz ang sasalingin.
TRIVIA: Si Edu ay ex ni Vilma. Anak nila si Luis “Lucky” Manzano. Mag-ex din sina Edu at Maricel.