GORGY RULA
Si Eric Quizon ang magdidirek ng 38th Star Awards for Television ng PMPC na gaganapin sa Dolphy Theater, ABS-CBN Compound, Quezon City, sa darating na Linggo, March 23, 2025.
Napag-usapan namin ang Dolphy Theater sa story conference ng gagawing pelikula ni Eric, ang Jackstone 5 ng Royal Star Media Production Philippines, Inc., na ginanap sa Max's restaurant sa Roces Avenue, Quezon City, kahapon, Marso 18, 2025.
Ang Jackstone 5 ay ididirek ni Joel Lamangan, na isa rin sa mga artista kasama sina Eric, Gardo Versoza, Arnel Ignacio, at Jim Pebanco.
Ayon kay Eric, baka ang Star Awards for TV na ang huling trabaho niya sa Dolphy Theater — na ipinangalan sa kanyang yumaong ama at Comedy King na si Dolphy.
Kasama kasi ang Dolphy Theater sa gigibaing gusali dahil bahagi iyon ng malaking lupain ng ABS-CBN na ibinenta sa Ayala Land, Inc.
Read: ABS-CBN, ibebenta ang malaking bahagi ng lupa sa halagang P6.2B
Parang hindi pa raw nagsi-sink in kay Eric nung nabalitaan niyang binili na ang malaking bahaging iyon ng ABS-CBN compound.
Saad niya: “Of course, nung nakita ko, 'Ah okay…' Hindi pa siya nagsi-sink in, e.
"Kasi una sa lahat, pag-aari naman nila iyon.
“Parang the Dolphy Theater was just given to him, in honor of him....
“Pero like I said nga, this Sunday, magdidirek ako ng Star Awards and sa Dolphy Theater siya gagawin.
“So, ayun siguro, magiging… I don’t know, baka mag-senti ako dun. Baka mag-walling ako dun,” napangiti niyang pahayag.
Ang ibig sabihin ni Eric ay baka gayahin niya ang eksena sa mga pelikula at teleserye kung saan ang karakter ay umiiyak habang nasa likuran ng pader.
Read: Eric Quizon, maiyak kaya sa paggiba sa Dolphy Theater?
DOLPHY THEATER AS PART OF ERIC'S SHOWBIZ CAREER
Malaki raw ang naging bahagi ng Dolphy Theater sa showbiz career ni Eric, pati sa kanilang pamilya.
Hindi raw niya maiwasang malungkot.
Lahad niya: “Naka-work ako sa Dolphy Theater. Dinala namin yung body ng daddy ko sa Dolphy Theater… talagang dun sa ABS, bago siya dinala sa Heritage.
“May mga ganun na ano… maraming naganap sa Dolphy Theater, both like work and malulungkot na nangyayari sa buhay namin.
“Siyempre, pagka… if you reminisce, pag maalala mo yung mga yun...
"Pero right now, hindi ko pa alam kung ano yung mararamdaman ko.
“But of course, when I heard about it, parang, 'Ay, sayang naman.'
"But like what I said, wala naman tayong magagawa.”
Read: Epy Quizon, ikinalungkot ang pagde-demolish sa Dolphy Theater
Malaking bahagi rin daw ang ABS-CBN sa karera ng ama ni Eric na si Dolphy bilang aktor at Hari ng Komedya.
“Nakakalungkot. I think it’s more than just my dad. I think it’s the theater named after him.
“Pero imadyinin niyo yung history ng ABS, parang… di ba, pag pumasok ka ng ABS, nakapaskil pa nga dun is, 'This building was built in 1950 something, may mga ganun pa nga siya, e.
“Sa daddy ko yung Buhay Artista… he had a very good relationship with the Lopezes.
“Siyempre, parang my dad was part and parcel of ABS,” sabi pa ni Eric.
Ang Buhay Artista ay ang dating TV show ni Dolphy, kasama si Panchito, na umere sa ABS-CBN (Channel 3) mula 1967 hanggang 1972 — taon kung kailan ipinasara ng Marcos administration ang TV network matapos ideklara ang martial law.
Read: Comedy King Dolphy dead at 83
NOEL FERRER
Ano ang nararamdaman ni Eric na ang naging dahilan ng lahat ng ito ay ang pagtanggal ng prangkisa ng ABS-CBN, noong Hulyo 10, 2020, noong panahon ni dating Pangulong Rodrigo Duterte?
Hindi rin maganda ang nangyayari ngayon sa dating Pangulo, na kasalukuyang nakapiit sa The Hague, Netherlands, dahil sa alegasyong crime against humanity.
Read: EXPLAINER: What is ICC and why is it handling the Duterte case?
Medyo matagal nag-isip si Eric Quizon. Maaaring nag-isip siya ng safe na sagot dahil ayaw sana niyang haluan ng politika ang interbyu.
Ang sabi lang ni Eric: “Like I said, even if my dad was part and parcel of ABS CBN, wala naman akong magagawa, e. Wala tayong magagawa.
“I think it’s more on the legacy of… not just my dad, but the whole of ABS.
“Imadyinin mo yung tower na yan, ang tagal na nandiyan, tapos mawawala yung tower, di ba?
“Nakakalungkot isipin. But huwag na nating isama yung politics dito.
“Kasi as it is, what’s going on in our country, parang, I don’t know… it’s sad na kailangan mo ba talagang magsiraan?
"Kailangan mo talaga... tayong dumaan sa… kailangan ba nating manira ng isa’t isa, just to get what you want?
“So, yun lang yung mahirap sa sitwasyon natin ngayon.”
Ang gusto lang daw sana ni Eric ay maging mapayapa ang lahat at matapos na ang pinagdadaanan ng ating bansa.
“Siyempre, parang sagot ng mga beauty contestant, di ba? World peace.
“Sana manaig lang talaga yung peace sa bansa natin, e. Kasi mahirap ang giyera.
"Mahirap din yung dumaan tayo sa ganun na puwede naman tayong magkasundo, di ba?” seryosong pahayag ni Eric.
Read: ABS-CBN Corporation franchise renewal timeline
JERRY OLEA
Itong Jackstone 5 ang third gay role ni Eric sa pelikula directed by Joel Lamangan.
Nauna rito ang Pusong Mamon (1998) at So… Happy Together (2004).
Ang papel dito ni Eric ay si Felix aka Felicity na drama queen. Kare-retire lang niya bilang head nurse ng isang ospital sa Doha, Qatar.
Hindi na matandaan ni Eric kung ano ang huling movie na ginawa niya. Basta, bago pa raw iyon magpandemya.
Nang tawagan siya ni Direk Joel for Jackstone 5 ay agad niyang tinanggap ang project kahit hindi pa idinedetalye ang gay role niya sa movie.
“Hindi ako puwedeng humindi kay Direk Joel,” pakli ni Eric.
Nasa London daw si Eric two weeks ago nang sabihan siya ni Direk Joel about Jackstone 5.
“Sabi ko talaga, ‘Oo naman, Direk, hindi kita puwedeng hindian.’ Hindi ko pa alam ang istorya,” sabi ni Eric.
“Kasi alam ko naman, basta si Direk Joel ang gumawa, I mean, alam ko naman na hindi niya ako bibigyan ng role na basta-basta lang.
“I know na naniniwala siya sa kakayahan ko kaya alam niya kung bagay sa akin.
"Kasi ang direktor naman, remember, ang direktor ang namimili kung sino ang gusto niyang artista. Kung sino ang bagay, di ba?
“So I think, doon sa description ng character, ako ang pinili niya.”