GORGY RULA
Tuwing nagse-celebrate ang mag-asawang Gladys Reyes at Christopher Roxas ng kanilang wedding anniversary, tinitiyak ng aktres na makapag-treat siya sa mga kaibigang miyembro ng entertainment media.
Ipinagdiwang nilang mag-asawa ang kanilang 21st wedding anniversary noong January 23, pero 32 years of togetherness, sabi ni Gladys.
Read: Gladys Reyes, Christopher Roxas celebrate 20 years of marriage
Hindi raw puwedeng palagpasin ang taon na hindi ma-treat ang mga kaibigang entertainment press dahil malaki raw ang utang na loob niya sa mga ito.
Nagpa-lunch siya sa ilang malalapit na kaibigan na press, na ginanap sa kanilang That’s Diner sa Sta. Lucia Mall, Cainta, Rizal.
Si Christopher ang nag-aasikaso ng restaurant, lalo na sa mga pagkaing inihahanda sa kanilang diner.
"Chef Chris" na ang tawag kay Christopher dahil sa kanilang restaurant business na siya nagpo-focus.
Si Gladys naman ang bahala sa marketing.
Bukod sa Sta. Lucia, meron pa silang That’s Diner sa San Pedro, Laguna. Ipinatikim nila ang mga specialty nilang Bulalo Supreme, Dinakdakan, Bulalo Kare-Kare, fried lumpia, Fried Bangus na may laing o Bicol express, at ang Flaming Chicken.
Ikinatuwa ito ng mga inimbitahang entertainment press.
Sabi ni Gladys, hindi siya naniniwala sa sinasabi ng ilang kilalang celebrities na hindi kailangan ang mga entertainment press ngayon dahil kaya nilang i-promote ang kanilang sarili, basta malakas lang sa social media.
“Hindi po totoo yan,” bulalas ni Gladys.
“Kailangan namin ng tulong niyo, kailangan pa rin ng suporta niyo, di ba? At ang dami niyong naitulong in the past.
"Pagpapatunay lang na mula noon hanggang ngayon, kailangan natin ang ating movie press, media, kailangang-kailangan pa rin hanggang ngayon.”
GLADYS'S NEW TELESERYE IN GMA-7
Doon na rin sa kanilang That’s Diner ay masayang kinuwento ni Gladys na malapit na nilang simulan ang bagong drama series na gagawin niya sa GMA-7.
Ito iyung Cruz vs. Cruz kunsaan makakasama niya si Vina Morales na first time pa lang daw niyang makatrabaho.
“First time ko naman to work with Vina Morales sa isang serye.
“So, abangan niyo dahil teleserye ito, kaabang-abang ang mga, kumbaga, intense na eksena with Ate Vina,” pakli ni Gladys.
Hindi lang maidetalye ni Gladys kung ano ang role niya rito at kung ano ang kuwento.
Pero kakaiba raw ang role niya rito, na bukod kay Vina Morales, kasama rin niya rito sina Neil Ryan Sese, Kristoffer Martin, Liezel Lopez, Pancho Magno, at Elijah Alejo, sa ilalim ng direksyon ni Gil Tejada.
"Ayokong sabihin kung ako ba yung sasampalin o siya. Uy, di ba?
“Isa pa yun sa excited ako, kasi I think isa ito sa magiging memorable talaga sa akin, kasi imagine title role kami ni Ate Vina.
“So, Cruz vs. Cruz, di ba?” sabi pa ni Gladys.
Read: "OG Kapuso" Vina Morales balik-GMA makalipas ang 25 taon
NOEL FERRER
Nagbigay rin si Gladys ng ilang detalye tungkol sa serye.
“Si Vina kasi is the common-law-wife. Ang masasabi ko lang, ang yabang ko dito sa Cruz vs. Cruz kasi ako ang pinakasalan,” sabay taas ng kilay ni Gladys nang sinabi niya ito.
Hindi siya kabit sa drama series? Hindi siya escabeche?
“Hindi! Ako pa ba papayag na syobit, hindi!” tili ni Gladys.
Kung maaari lang, ayaw raw niyang gumanap na kabit sa isang pelikula o teleserye.
“Minsan kasi parang iniiwasan ko rin, kasi ang mga anak ko nakakapanood din.
“Parang sa akin kasi, lalo na kung alam mong meron nang nagmamay-ari, di ba? Ang dami-dami namang lalaki,” sambit ni Gladys.
Dito sa Cruz vs. Cruz, hindi lang daw niya masabi kung kontrabida siya rito.
“Secret muna, kasi, di ba, sanay na sanay sila na salbahe ako. E, tingnan natin kung ano bang nasa isip ng GMA,” pakli ni Gladys.
JERRY OLEA
Maikukumpara ni Gladys Reyes ang husband niyang si Christopher Roxas sa classic bulalo na bestseller ng That’s Diner.
Katwiran ni Gladys, “Kasi siyempre, di ba, ang bulalo ay talagang lagi iyang gusto talaga natin. Kasi mainit yung sabaw, di ba?
“At saka siyempre, nare-refresh tayo kapag tayo ay kumain niyan. At higit sa lahat, siyempre ito yung all-time favorite ko, e. Classic bulalo!”
Oh! Mahilig siya sa karne?
“Ay! Hindi naman! Siyempre, mas gusto ko yung bone marrow,” sambit ng premyadong aktres.
“Bilang awa naman ng Diyos, tayo naman ay healthy pa at walang mga mainte-maintenance.
“So, sinasamantala natin na ma-enjoy pa yung collagen ng bone marrow, di ba?
“Ang maganda sa bulalo namin, parang si Christopher din, very versatile. Puwede siya minsan sizzling bulalo.
“Puwede rin naman siya minsan kare-kareng bulalo which is my personal favorite dahil Kapampangan ako.
“At puwede rin siya minsang bulalo pares… Ay! Talaga namang napaka-versatile ng katulad din ng pagmamahalan namin ni Christopher.
“Parang siya nga. Puwede siya minsang sizzling, puwede siyang classic lang. Puwede naman minsan, pares, ganun?”
Gaano ka-sizzling? Hanggang saan ang init o anghang?
“Alam mo in our 32 years of togetherness, I think ano, hindi naman — eto, it works for us — pero I think, para sa akin, ano, sa mga nagtatanong, ‘Ano ang sikreto?’
“Siyempre parang… hindi naman sikreto talaga. Pero importante meron kang masarap na asawa!” bulalas ni Gladys.
“O, teka lang! Masarap in such a way na masarap magluto, masarap magmahal, masarap mag-asikaso. So in totality, masarap ng asawa.”
Inusisa namin si Christopher kung gaano naman kasarap na asawa si Gladys. Singit ni Gladys, “Magmahal! Masarap daw ba o maanghang?”
Napapangiting tugon ni Christopher, “Pareho!”