JERRY OLEA:
Meta horror ang Strange Frequencies: Taiwan Killer Hospital, na isa sa sampung kalahok sa 50th Metro Manila Film Festival (MMFF).
Gumanap dito sina Enrique Gil, Alexa Miro, Jane de Leon, MJ Lastimosa, Rob Gomez, Raf Pineda, at Zarckaroo as themselves.
Dalawampu’t pito (27) ang cameras na ginamit ng produksyon, at bawat isa sa pitong bida ay tigtatlo ng dala-dalang camera. Sila-sila mismo ang cameramen.
Tilian nang tilian ang fans sa ilang eksena sa premiere night ng movie nitong Disyembre 19, Huwebes, sa Cinema 3 ng SM Megamall, Mandaluyong City.
Maa-appreciate ang movie ng magbabarkadang GenZ. Iyong shaky camerawork ng Strange Frequencies: Taiwan Killer Hospital ay may bahid ng “found footage” mockumentary na The Blair Witch Project (1999), pati ng controversial Cannibal Holocaust (1980).
Ito namang Strange Frequencies: Taiwan Killer Hospital ay nag-“live streaming” ng isang gabi sa Xinglin Hospital sa Taiwan (R.O.C.).
Iyong found footage technique ng The Blair Witch Project ay naka-influence sa horror movies na Paranormal Activity (2007), REC (2007) at Cloverfield.
Sa promo ng The Blair Witch project noon, pinalutang na ang tatlong estudyante sa istorya ay pawang pumanaw na o nawawala. May mga nag-akala rin na totoo iyong pagkamatay ng ilang karakter sa Cannibal Holocaust.
ENRIQUE GIL ON SHOOTING STRANGE FREQUENCIES
Sa kaso ng Strange Frequencies: Taiwan Killer Hospital, buhay na buhay ang pitong bida na masisipag mag-promote, at pawang dumalo sa premiere night. Co-producer dito si Quen (palayaw ni Enrique) nina Dondon Monteverde at Direk Erik Matti.
Sabi ni Quen bilang producer, “Pagdating sa shoot siguro, more of ano lang, guiding lang na, ‘Prepare yourselves. So, kung anuman yung ma-feel niyong sabihin, sabihin niyo. Kahit huwag niyong masyadong gayahin yung script.’
“Kasi we’re playing as ourselves, e, so just be true to yourself sa kahit ano mang sitwasyon na madadaanan.
“Paano ka ba? Paano mo gagawin?”
Anu-ano ang pinaka-challenge sa kanya bilang aktor at bilang producer sa project na ito?
“Para sa akin siguro was the shoot itself sa Taiwan. Kasi abandoned place yun,” tugon ni Quen.
“So, siyempre, hindi mo control yung weather. Pag umulan, baha sa loob. Kasi abandoned nga siya, so medyo hindi… may mga butas na siya sa bubong at lahat.
“Maraming hazard. Maaari kang mamatay. May mga butas sa sahig, puwede kang diretsong ground floor galing sa itaas. May mga lamok.”
Insured ba sila kung mapanganib pala iyong location ng shooting nila?
Mabilis na sagot ni Quen, “Siyempre, siyempre. Pero siyempre, as much as possible, gusto namin, super-safe.
“So siyempre in a way as producer, you know, may konting responsibility. Di ba? So, yun na.”
Read: Enrique Gil on fame: “It really means nothing.”
Noel Ferrer
Natanto nina Alexa Miro at MJ Lastimosa na kailangang maging respectful sila sa spirits sa naturang haunted hospital sa Taiwan.
“Of course, dapat respectful po talaga tayo lalo na, nasa Taiwan tayo. Ibang kultura kasi yun, e,” saad ni Enrique “Quen” Gil.
Iba rin ang language doon, huh?!
“Oo at hindi ko maintindihan yung ibang multo, basta natatakot na lang kami!”
Ibinalita rin ni Quen na may pagbibidahan siyang Kapamilya teleserye next year, pero hindi pa niya puwedeng i-divulge ang details.
Read: Fearless forecast: MMFF 2024 top 4 entries sa box office
GORGY RULA:
Bakit sa Taiwan nag-shoot ang Strange Frequencies: Taiwan Killer Hospital? Hindi ba puwede sa Pilipinas? May ibang bansa pa ba silang pinagpilian?
Sagot ng producer na si Dondon Monteverde: “Well, una sa lahat siyempre, marami nang horror movie kasi na ginagawa sa Pilipinas.
“So, we wanted to bring in a different texture. Different sensibility when it comes to horror, di ba?
“Kahit adaptation siya, siyempre hindi naman ginaya talaga totally, di ba? Ginawa nating Pinoy pa rin yung touch, with the touch of Taiwan, di ba?
“Na talagang parang ghost ng Taiwan, iba-ibang galawan, iba-ibang religion, di ba? Para totally, iba naman ang mapanood ng mga horror fans natin.
“Kaya nag-decide talaga kami sa Taiwan. And nung ginoogle talaga namin ito, ang pinaka-haunted talaga sa buong Asia, is yung Xingling Hospital.
“Kami ni Quen, ginoogle namin yan. Nag-research kami, di ba? So sabi namin, ‘Kailangan, doon tayo pumunta!’
“Kasi siyempre yung location is the star of the show.”