JERRY OLEA:
Highlight ng Mark My Dreams concert ni Mark Bautista ang duet nila ni Regine Velasquez-Alcasid ng "Tuwing Umuulan at Kapiling Ka."
Ipinagdiwang ni Mark sa nasabing concert ang ika-21 anibersaryo niya sa showbiz. Ginanap iyon kagabi, Agosto 31, 2024, Sabado sa The Theater at Solaire.
Kabilang sa mga nanood ang mga bossing ng Viva Entertainment na sina Boss Vic del Rosario Jr., Vincent del Rosario, at Veronique del Rosario.
May exposed na konting skin si Regine sa kanyang gown. May pa-cleavage.
Pagbibiro ni Mrs. Alcasid, “Hindi malaki ang ibinayad sa akin ni Boss Vic dito… Hi, Boss Vic! Hindi mo ba naano, nag-prepare na ako. Kasi, magbi-Vivamax na ako ngayon!”
Napahalakhak si Mark at ang karamihan sa audience.
“Parang puwede! Puwede pa,” pakli ni Mark.
Hirit ni Regine, “Kasi, iyun talaga ang pangarap ko sanggol pa lang ako. Maging—hindi sexy star, sinasabi ko sa iyo—bold star!”
“Saktung-sakto sa Vivamax,” pakli ni Mark.
Tumango si Regine, “Oo, saktung-sakto. Hindi! Talaga! Meron na akong series dun, oo — Pokpok, Ang Babaeng Karpintero.”
“May title na?” hirit ni Mark.
“Oo. Pokpok, Ang Babaeng Karpintero. That’s my new series. Abangan niyo yan, ha?!” bulalas muli ni Regine. Hagalpakan muli ang mga manonood.
Maliban sa Asia’s Songbird, panauhin sa concert sina Erik Santos, Christian Bautista, Arman Ferrer, Audie Gemora, Franco Laurel, Jona, Katrina Velarde, Arthur Nery, at Rob Deniel.
May sakit si Arthur pero sumipot pa rin siya sa anniversary concert ni Mark. Nag-VTR message sina Sarah Geronimo at Rachelle Ann Go.
In-introduce ni Martin Nievera ang "Let It Go (The Full Monty)" production number. Kasama ni Mark na kumaldag at kumadyot sina Migo Valid, Milo Cruz, Marco Gomez, at Mon Mendoza.
Read: Carmi Martin reveals getting sexual advances during her prime
GORGY RULA:
Kita sa Mark My Dreams concert ni Mark Bautista na hands on siya sa konsepto nito.
Pagkatapos ng virtual na duet niya kay Barbra Streisand, si Regine ang panghuli na talagang sumusuporta sa mga magagaling at promising na singers ng bansa.
Sa mga baguhan, mga nakatrabaho niya, at naging bahagi ng mga shows niya ay nandiyan talaga ang Asia’s Songbird para sumuporta.
Siyempre, hindi nawawala ang pakuwela ni Regine na siya lang ang nakakatawid ng may kahalayan na jokes.
Pero ang nakakatuwa rito, ibinahagi ni Regine ang halos pagkakatulad ang mga pinagdaanan nila ni Mark noong nagsisimula pa lamang sila at sumasali sa mga singing contest.
Si Regine kasi ang host ng Star For A Night (2002) na pinanalunan ni Sarah Geronimo at first runner-up doon si Mark.
Kuwento ng Asia’s Songbird, “Nakita ko si Mark, bata pa lang siya. And the first time I saw him, he had this really nervous look.
“And nung kinuwento sa akin ng staff kung bakit, kasi wala pala siyang pamasahe pauwi. So iyung mindset niya, he has to win.
“And you know, meron din akong mga ganyang experiences. Yung tumatawid ako ng bukid, tapos nasa gitna ng bukid kasi yung stage ng singing contest.
“So maglalakad ka lang, hindi na kasya yung tricycle dun. So, lalakarin mo yun na naka-three-inches ka na high heels.
“So wala ka nang choice. Alangan namang magpaa, yapak ka dun. Pero minsan, puwede din.
“So, lalakarin mo yun. So ako yung mindset ko, ‘My goodness, kailangan ako manalo dito kasi lalakarin ko yun pabalik!’
“Can you imagine kung natalo ako," sabay umakto si Regine na nakatungo na parang lugung-lugo.
Patuloy ni Regine: "Ang lungkot ng lakad mo, di ba? Gagawin mo lahat, at iyun yung nakikita ko kay Mark, yung determination niya, nandun.
“And of course he has this huge, beautiful, and so clear na voice talaga na I’ve fallen in love with his voice. And his personality, he was so quiet.”
Umaayon si Mark sa mga sinasabi ni Regine na ganun talaga ang nasa isip niya nun kapag nakasalang siya sa Star For A Night.
Kinuwento na rin ni Mark na hindi siya makapaniwalang pagkatapos ng competition ay ipinakuha raw ni Regine ang number niya.
Pero pinapirma na pala siya agad ni Boss Vic del Rosario ng Viva.
“Sabi ko talaga, ‘Grabe! Si Ms. Reg, gusto akong makilala,’ parang ganun,” pagbabalik-tanaw ni Mark.
“Na parang feeling ko na parang… Ay! Baka makapunta ulit ako ng Manila.
"Kasi akala ko talaga tapos na yun, e. Na parang after ng contest, parang ahhh uwi na ako.
"Sabi ko, may naniniwala pala sa akin. So baka talaga, baka puwede kong ipagpatuloy ito.”
Pagtatapat pa ni Mark, “Sumali ako ng Star For A Night dahil nakita ko na si Miss Reg yung host. Sabi ko, ‘Ahh legit ito na competition! Andiyan si Miss Reg, e.'
"Kahit IBC-13 pa yun, Sabi ko, 'Hindi, andiyan si Regine Velasquez, talagang ano yan, prestigious!”
Natawa si Regine, “Ako pala yon?!”
Pag-ayon ni Mark, “Ikaw ang susi! Ikaw ang instrument! Totoo po yun, totoo po yun. Sabi mo nga dati, ikaw ang nagluwal sa akin.”
Habang ume-exit si Regine, humirit pa siya, “Abangan niyo yung Vivamax ko. Kasi marami akong gagawin.
“Ta-tumbling ako dun. Kakain ako ng bubog. Marami. Abangan niyo!”
Read: CCTV footage shows Sandro Muhlach's state after alleged incident
NOEL FERRER:
May soft spot tayo kay Mark Bautista dahil nakita natin ang kanyang kahusayan at kabutihan noon pa man.
I remember having written his very first major concert Pop Heartthrob at the Aliw Theater on March 24, 2006 na si Direk GB Sampedro din ang direktor, at si Marc Lopez ang musical director.
Last night was a testament of Mark’s many talents and his good will to this industry and friends/co-workers who love him back!
Nag-stand out talaga sa akin ang number ni Mark para sa kanyang mga magulang. Kinanta ni Mark ang "Moon River," na paborito ng kanyang ina. Bumaba si Mark sa stage at lumapit sa ina, na agad tumayo at yumakap kay Mark.
Ang kasunod na awit ni Mark, "And I Love You So," ay inialay niya para sa kanyang ama na namayapa noong Enero 2020.
Ang major reason kaya blessed si Mark is BECAUSE OF HIS GREAT LOVE FOR HIS PARENTS and his devotion to his FAMILY!!!
Truly God favors those who honor their mother and father; and that’s why Mark continues to touch our hearts in everything that he is and he does. Mabuti siyang anak, at nakaugat sa pamilya.
Maliban sa number with Regine na napakagaling at supportive sa mga iniluwal niyang artists, paborito ko rin ang “duet” ni Mark with Barbra Streisand na "You Don’t Bring Me Flowers," at ang original song niya na "Halik Sa Hangin." Ang ganda ng kanta!
Mark should hone his songwriting skills pa kasi he’s got it talaga. There are more good memories I have of Mark.
I will never forget him giving me a promised drawing when I had Covid and Mark singing my song with Louie Ocampo para sa mga pumanaw noong pandemya.
At sa akin din niya ipinagkatiwala ang kanyang Q&A sa kanyang libro.
Basta, we’ll ever be supportive of Mark na pinanood pa natin sa London sa Here Lies Love, di ba, Tito Gorgy?