JERRY OLEA
Sandamukal ang concerts ngayong Pebrero sa iba’t ibang panig ng bansa.
Ang MOIRA concert na gaganapin sa Pebrero 3, Biyernes ng 7:00 pm sa Araneta Coliseum, SOLD OUT na ang tickets na Platinum, VVIP, VIP1, VIP2, Patron, Lower Box A, at Upper Box.
Post ng Facebook page ni Moira dela Torre noong Enero 31, Martes ng gabi, “only the last few tickets for genAd are available - the rest are sold out
“see you all in 3 days salamat na agad”
Opo! Konting tiket na lang ang naiiwan sa General Admission section, na free seating! Congrats, Moira!
Ang ex ni Moira na si Jason Hernandez, meron din kayang concert this month?
Basta, ang official music video ni Zack Tabudlo ng kantang "Akin Ka" ay nasa eponymous YouTube channel niya umpisa Enero 30, 2023, Lunes.
Nagbago ng poster ang “Tingog ng Pasasalamat” concert series na konektado sa UniTeam. LIBRE ito!
Maraming nag-react sa unang poster kung saan prominent ang litrato ni Bamboo sa sentro, at napapagitnaan siya nina Karla Estrada at Andrew E.
Pare-parehong “featuring” ang pagpapakilala sa kanilang tatlo, pati na sa ibang kalahok sa concert series na Plethora Band at ILT Band.
Sa bagong poster, nasa center pa rin ang picture ni Bamboo, pero halos whole body iyon, kaya maliit ang mukha niya. Ang kitang-kita ay ang mukha nina Karla at Andrew E.
Nasa poster pa rin iyong dalawang banda. Nawala na ang mga “featuring.”
Bago ang pangalan ni Bamboo, nakasaad na “with special guest performer.”
Iyong Facebook post ng political party na Tingog Party List ay naglagay ng DISCLAIMER kaugnay sa bagong poster, “This is to inform the public that Bamboo is not connected to and in endorsement with any political party.
“His upcoming shows for Tingog Party-List’s Pasasalamat Concert is confined merely as a guest performer and not as an endorser nor supporter of any party or person. Thank you very much.”
Ang libreng concert series ay gaganapin sa Pebrero 12 (Mandaue City, Cebu), Pebrero 17 (Tagum City, Davao del Norte), Pebrero 25 (Amoranto Sports Complex, Roces Ave., Quezon City), at Marso 4 (Tacloban City).
NOEL FERRER
Trabaho lang. Pera-pera lang. Iyan ang pahiwatig ng bagong statement regarding the performers sa libreng concert ng party-list.
Si Moira naman, across all ages and political affiliation, kita mong suportado ito ng madlang people. At tunay ngang may purchasing audience siya!
Push kete push pa rin ako sa concert ng aking talent na si Arman Ferrer sa BGC Arts Center sa Valentine’s Day na para naman sa Angat Buhat NGO.
Mabibili pa rin ang tickets sa Ticketworld at 88919999 at talagang ang daming numbers na ikamamangha ng mga tao.
Directed by Floy Quintos, aasahan mong maganda talaga ang kalalabasan nito katulad ng successful na CCP show nito kamakailan.
Buhay ang live music at concert scene lalo ngayong buwan ng Feb-ibig. Sana, ganun din sa ating industriya ng pelikula.
GORGY RULA
Sa Pebrero 3, Biyernes, ay ilulunsad ng Film Development Council of the Philippoines (FDCP) ang “Sine Sinta: Pag-ibig at Pelikula” sa Rizal Open Air Auditorium ng Luneta Park. Libre ito!
Sa mga interesado, mag-register at magpareserba ng upuan. Ang link ay nasa Facebook page ng Film Development Council of the Philippines (FDCP).
5:00 p.m. ang mini-concert dito na tatampukan nina Jona at Bugoy Drilon.
Ipapalabas kapagkuwan ang mga pelikulang Labs Kita… Okay Ka Lang? (6:30 p.m.) at The Hows of Us (8:30 p.m.).
Sa Pebrero 3 at 4, Biyernes at Sabado ng 7:30 p.m., sa Newport Performing Arts Theater, gaganapin naman ang Some Kind of Valentine.
Unlimited love, music and laughter ang ihahatid nina Tirso Cruz III, Edgar Mortiz, at Christopher de Leon with special guest Lovi Poe.
Pebrero 3, 4 at 5, Biyernes hanggang Linggo, ang Enhypen Manifesto in Manila sa SM Mall of Asia Arena.
Naka-display sa Araneta City ang omnibus poster ng mga forthcoming concerts nila. Magtatanghal sa Smart Araneta Coliseum ang Boyce Avenue (Pebrero 11), Mamamoo (Pebrero 12), Westlife (Pebrero 20 at 21), One Republic (Pebrero 23), at si Bryan Adams (Marso 15).
Naka-line up naman sa New Frontier Theater ang Divine Divas: The Ultimate Drag Experience (Pebrero 10) at Wallows (Pebrero 15).
Apat na gabi ang SOLO concert ni Regine Velasquez — Pebrero 17, 18, 24, at 25 sa Samsung Performing Arts Theater, Circuit Makati.
Exclusive sa SSVIP ticket holders ang meet-and-greet ng Asia’s Songbird.
