NOEL FERRER
Isang rare treat sa fans nina Martin Nievera and Pops Fernandez ang Facebook Live chat and concert nila nitong Marso 23, Lunes.
Gamit nila ang kani-kanilang personal Facebook accounts.
Kahit may technological challenges sila sa kanilang live streaming ay nakuha nilang mag-duet ng "Always" habang naka-split screen.
Maganda na kahit magkaiba na ang kanilang networks, ang Kapusong si Pops at Kapamilyang si Martin ay nagsasanib-puwersa para magbigay-aliw sa kanilang fans.
Pero higit sa lahat ay umapela sina Pops at Martin sa mga tao na tumulong sa mga naghihikahos at sa frontliners sa gitna ng COVID-19 pandemic.
If the situation can bring ex-couples together as co-workers, sana ay marami pa ring magkakapamilya ang magsasama-sama para sa kapakanan nating lahat.
GORGY RULA
Dahil sa teknolohiya, patuloy pa ring makakapagbigay ng aliw ang ating entertainers.
Ang hangad ko lang sana, hindi ito sasakupin ng network war.
Si Martin ay nasa ASAP Natin ‘To ng ABS-CBN, at si Pops ay nasa Centerstage ng GMA-7.
Marami pa sana tayong aasahang collaboration ng magagaling nating entertainers.
Bakit hindi subukang magkaroon ng live chat at concert sa Facebook sina Regine Velasquez at Ogie Alcasid sa mga taga-Kapuso gaya nina Julie Anne San Jose, Aicelle Santos, Mark Bautista, at Christian Bautista?
Siguradong exciting kung magpasiklab sa iisang social media platform ang mga produkto ng The Voice at The Clash. Ang saya-saya siguro niyan!
Pansamantalang makakalimutan natin ang bagot sa enchanced community quarantine.
Iisa lang ang dasal nating lahat—huwag na sanang ma-extend ang pagkalat ng sakit na ito.
JERRY OLEA
Magkaibigan na sina Martin and Pops. May mga concert sila together.
Siyempre, bilib tayo sa makabuluhan nilang collab.
Ang wish ko na mag-duet sa panahon ng COVID-19 ay ang dating magkaibigan sa The Voice Kids Philippines na sina Darren Espanto at Juan Karlos “JK” Labajo.
Nawa’y matuldukan na ang kanilang hidwaan!