GORGY RULA
Two years and five months na pala ang relasyon nina Jak Roberto at Barbie Forteza, pero hindi pa rin daw nawawala ang pagka-crush ni Barbie kay Dennis Trillo.
Ikinuwento ng magkasintahan sa pocket presscon ng Wagas episode nilang Wait Lang… Is This Love? na sobrang kampante na sila sa kanilang relasyon.
Minsan, nagugulat na lang si Jak, ang picture pa ni Dennis ang nakikita niya at hindi ang litrato niya.
“Hinihiram ko yung laptop niya, e. Nag-edit ako minsan, pagkakuha ko yung mousepad, si Dennis.
“Ano ‘to! Paliwanag mo ‘to!” natatawang kuwento ni Jak.
“Crush lang naman talaga, e. Idol, ganun,” depensa ni Barbie.
Hindi isyu sa kanilang relasyon ang pagka-crush ni Barbie kay Dennis.
Dahil si Jak naman pala ay si Jennylyn Mercado ang crush.
“Medyo nagkaintindihan kami sa part na yun, kasi crush ko si Dennis, crush niya si Jennylyn. Patas lang,” hirit ni Barbie.
Ngayong sila ang bida sa episode ng Wagas, sinasabi nilang wagas na rin ang kanilang pag-iibigan.
“Araw-araw naman po, e,” pakli ni Jak.
Sabi naman ni Barbie, “Ever since nung approved siya sa parents ko, sabi ko sa sarili ko na wala na akong magiging problema rito.”
Nagulat ang magkasintahan nang ibinalita sa kanila ni Arniel Serato ng PEP.ph na World Boyfriend Day daw nitong October 3, Huwebes.
Kaya binati naman ni Barbie si Jak ng Happy World Boyfriend Day.
Napapanood na sa Wagas ang Wait Lang… Is This Love? episode nina Barbie at Jak, mula Lunes hanggang Biyernes, bago mag-Eat Bulaga.
NOEL FERRER
You are at your best kung tama ang relasyon.
Sana, bukod sa usaping personal, mag-transition na si Barbie sa pagganap ng significant roles.
I maintain na isa siya sa pinakamahusay na batang artista ngayon.
Kailangan lang ni Barbie na ma-push ang kanyang next moves para matuloy ang potential niya bilang isang compleat artist.
Go, go, go, Barbie!
JERRY OLEA
Masaya sina Barbie at Jak sa kanilang relasyon. Kuntento na rin siguro sila sa estado ng kani-kanyang career.
Kung saan man humantong ang pagmamahalan nilang wagas, maligaya ako para sa kanila.