JERRY OLEA: Ang daming panawagan at pakiusap na huwag mag-post ng spoilers tungkol sa Avengers: Endgame.
Kamukat-mukat mo, pinirata na ang buong pelikula at nasa Facebook, pinu-forward pa sa Messenger. Malinaw ang kopya na may Chinese subtitles, huh?!
Ayaw ni Thanos ng ganyan!
As expected, sumisira ng box-office records ang Avengers: Endame.
Tinatayang $169M ang hinamig ng pelikula nitong Abril 24, Miyerkules, sa 25 bansa sa labas ng North America, ayon sa Box Office Mojo.
Single-day records ang itinala ng Avengers: Endgame sa opening day sa China ($107.5M), Australia ($7M), Pilipinas ($3.9M), Hong Kong ($2.7M), Taiwan ($2.6M), Thailand ($2.4M), Malaysia ($2M) at Indonesia ($2.5M).
Umariba rin ang first-day gross nito sa Germany ($5.6M), Italy ($5.8M), France (estimated $6M), at South Korea ($8.4M).
Needless to say, mas umaarangkada ang Avengers: Endgame kesa sa Avengers: Infinity War (2018) sa lahat ng markets.
Makakaapekto ba ang pirated version ng Avengers: Endgame sa box-office results nito? Hindi.
Ratsada na ang advanced ticket sales nito. Sold out ang screenings.
Pinag-uusapan ang mga kaganapan dito, lalo na ang kinahinatnan nina Iron-Man, Captain America, at Thor.
May mga eksenang sinisigawan, at pinapalakpakan.
Iyong umaatikabong bakbakan, sa wide screen dapat panoorin.
Bonggang-bongga ang word-of-mouth sa Avengers: Endgame!