May mabibiling bigas sa halagang PHP20.
Good news ito lalo na't nasa range ng PHP40+ at PHP50+ ang halaga ng bigas kada kilo ngayon.
Iyon nga lang, available lang murang bigas sa Ligao City, Albay.
Sa Facebook post ng AkoBicolOnlineTV noong August 2. 2022 ay makikita ang larawan ni Dindo Bataller habang nagbebenta ng bigas na naka-plastic at may timbang na isang kilo.
Ginawa niyang pansamantalang stall ang trunk ng kanyang sasakyan.
Bawat plastic ng bigas ay PHP20 ang presyo.
Pinilahan at naging mabenta ang murang bigas sa mga residente roon. Agad ding na-sold out.
Ang murang bigas ay inisyatiba ni Dindo at ng kanyang pinsan na si Elena Cascante Kipshoven, na isang rice mill owner sa Barangay Mahaba.
Ayon kay Dindo ay naging inspirasyon nilang magpinsan ang vlogger na si Kakampink 101, na nag-try magbenta ng bigas sa halagang PHP20 per kilo.
Aniya, “Ang maganda pa po dito, yung mga bigas na aming ibinibenta ng PHP20 per kilo ay inani ng mga magsasaka ng Ligao.
“Kaya sigurado na magandang klase ng kanin ang pagsasaluhan ng pami-pamilya.”
Dagdag pa niya, nasa 10 sako ng bigas ang kanilang inilaan ni Elena para ibenta sa murang halaga.
Tinawag nila itong Kakampink 102.
Paliwanag ni Dindo, “Kaya naman ng gobyerno ang PHP20 per kilo ng bigas.
“Iyon ay kung isasantabi ang pansariling interes at talagang uunahin ang pagpapagaan ng buhay ng pamilyang Pilipino."
Ang pagpapababa sa presyo ng bigas sa PHP20 per kilo ay isa sa mga ipinangako ni Pangulong Ferdinand Marcos, Jr. noong kampanya.