Malaki ang magiging pakinabang ng mga out-of-school youth sa Philippine Identification System (PhilSys).
Ayon sa Philippine Statistics Authority (PSA), magagamit nila ito kapag nag-enroll ulit sila sa hinaharap o nag-apply para sa scholarships.
Sa tala ng PSA, ang Pilipinas ay may halos 7 milyon na out-of-school youth, at karamihan sa mga ito ay walang valid ID o mga dokumento.
Ngayong ipinatutupad na ang PhilSys, may pagkakataon na ang mga ito na magkaroon ng Philippine Identification (PhilID) card o ang national ID, na tinatanggap bilang valid document ayon sa itinatakda ng batas.
“Aside from being free, it has a lifetime validity which individuals can forever use in various transactions,” ayon sa PSA.
Sa isang post sa official Facebook page ng PSA noong November 5, 2021, ibinahagi ang naging karanasan ng isang estudyante na nakatanggap na ng kanyang PhilID.
Saad nito, “Bago matanggap ang kanyang PhilID, nahirapan si 17-year-old PhilSys registrant John Quiel Peregrino sa ilang transactions dahil sa kakulangan ng valid ID.
“Ngayon, bilang estudyante na mayroon nang valid proof of identity sa pamamagitan ng Philippine Identification System, mas mapapadali na ang pagfi-fill up niya ng forms para sa hinaharap.”
BIRTH CERTIFICATE AT BARANGAY CERTIFICATE, TINATANGGAP SA REGISTRATION CENTERS
Ipinaalala rin ng PSA sa mga magpaparehistro para sa PhilSys ID na kung walang valid IDs, tatanggapin sa mga registration centers ang birth certificate na authenticated ng PSA o ng local civil registrar.
Tinatanggap din ang barangay certificate na may nakalagay ng address at larawan ng magpaparehistro.
Hanggang nitong October 2021, umabot na sa 40 milyong Pilipino ang nakakumpleto na ng registration process.