Hindi kakapusin ang supply ng tubig sa Metro Manila sa parating na summer season.
Ito ang tiniyak ni National Water Resources Board (NWRB) Executive Director Dr. Sevillo David Jr. ngayong Biyernes, March 5.
Sa panayam kay David ng TeleRadyo ng ABS-CBN, sinabi niyang sobra-sobra ang kasalukuyang water level sa Angat Dam.
Ang Angat Dam, na nasa Norzagaray, Bulacan, ang pangunahing nagsu-supply ng tubig sa mga kabahayan sa Metro Manila.
Ayon kay David, nasa 210 meters ang kasalukuyang water level sa Angat Dam.
Mas mataas daw ito sa naitalang level ng tubig sa dam sa parehong panahon sa nakalipas na mga taon.
“Sa ganitong level ay masasabi nating may sapat tayong supply ng tubig para magamit,” sabi ni David.
Aniya, kahit karaniwang kinakapos sa supply ng tubig ang Metro Manila kapag summer, hindi raw ito mangyayari sa susunod na mga buwan.
“WALA HO TAYONG WATER SHORTAGE DITO SA MAYNILA”
Una nang tiniyak ni Cabinet Secretary Karlo Nograles na magiging sapat ang water supply sa Metro Manila sa summer.
Sa kanyang online press briefing nitong Huwebes, March 4, sinabi ni Nograles na pinagbasehan ng kanyang anunsiyo ang pahayag sa kanya ng Metropolitan Waterworks and Sewerage System (MWSS).
“According to Metropolitan Waterworks and Sewerage System Chairman and OIC Administrator Reynaldo Velasco, we expect to have a sufficient supply of water this year in Metro Manila.
“Wala ho tayong water shortage dito sa Maynila,” pagtitiyak pa ni Nograles.
STABLE WATER SUPPLY FOR LUZON
Nitong February, sinabi ni Sonia Serrano, hydrologist ng Philippine Atmospheric, Geophysical and Astronomical Services Administration (PAGASA), na sapat ang magiging supply ng tubig mula sa apat na dam sa Luzon ngayong March at sa susunod na buwan ng April.
Bukod sa Angat Dam, ang tatlo pang pangunahing dam sa Luzon ay ang San Roque Dam, na nasasaklawan ang Pangasinan at Benguet; ang Pantabangan Dam sa Nueva Ecija; at ang Magat Dam, na ang lawak ay sakop ang Ifugao at Isabela.
Ayon kay Serrano, ganito ang pagtaya ng PAGASA sa water level ng apat na pangunahing dam sa Luzon sa katapusan ng March:
- Angat Dam: 200.2 meters
- San Roque Dam: 251.0 meters
- Pantabangan Dam: 199.9 meters
- Magat Dam: 191.3 meters
“Such forecast exceeds low water level in each of those dams,” paliwanag ni Serrano.
Para maikumpara, sinabi ni Serrano na ang delikadong low water level ng Angat Dam ay 180 meters, 225 meters sa San Roque Dam, 177 meters sa Pantabangan Dam, at 160 meters sa Magat Dam.