Pinalawak ng Land Bank of the Philippines ang saklaw ng direct loan program nito para sa mga estudyante, na maaari na ngayong makautang ng hanggang PHP50,000 na pambili ng mga electronic gadgets para sa online classes.
Ayon sa state-owned bank, ang pautang para maipambili ng tablet, laptop, o desktop computers ay ipapailalim sa maximum loanable amount na PHP150,000 kada estudyante o PHP300,000 kada parent-borrower para sa matrikula at iba pang bayarin sa eskuwela.
Alinsunod ito sa pinalawak na I-STUDY (Interim Students’ Loan for Tuitions towards Upliftment of Education for the Development of the Youth) program ng bangko.
“LANDBANK recognizes the need to support students in adapting to distance learning modalities,” saad sa pahayag ni LANDBANK President and CEO Cecilia C. Borromeo.
“While we await the resumption of in-person classes, we hope that the I-STUDY Program can help students cover the financial requirements to purchase needed learning equipment and participate in online classes,” dagdag niya.
EXPANDED STUDENT LOAN PROGRAM
Sa pagpapalawak sa I-STUDY program, itinaas ang maximum age eligibility ng estudyante sa 50 anyos mula sa dating 30 years old.
Saklaw na rin ng student loan program na ito ang mga estudyante na hindi fully covered ng scholarships ang matrikula, gayundin ang mga non-scholar students mula sa mga pribadong eskuwelahan.
Ang LANDBANK direct loan na ito para sa mga estudyante ay may fixed interest rate na 5% per annum.
Saklaw ng loan ang mga estudyante mula pre-school hanggang kolehiyo.
Para sa application requirements ng I-STUDY at iba pang detalye, tumawag sa LANDBANK Programs Management Department II sa (02) 8405-7198.
Para sa iba pang impormasyon tungkol sa iba pang loan products ng LANDBANK, bisitahin ang website (www.landbank.com) o i-follow ang mga official social media channels ng bangko (@landbankofficial sa Facebook at Instagram, @LBP_Official sa Twitter, at @LandBank sa Viber).