Tinatanggihan ni Kris Lawrence ang mga imbitasyong makapanayam siya tungkol sa nanumbalik na relasyon nila ni Katrina Halili, ang ina ng kanyang anak na si Katie.
Maliban sa sagot na “It just happened” at sa impormasyong nagkabalikan sila ni Katrina noong Setyembre 13, 2026, 12:02 A.M.— na napapanood sa kanilang vlog — hindi na nagbigay ng ibang detalye si Kris tungkol sa masasayang pangyayari sa kanilang buhay.
Buo ang paniniwala ni Kris na si Katrina lamang ang may karapatang magsalita o magkuwento tungkol sa kanilang muling pagkakabalikan.
Dahil dito, tumatanggi siyang magpainterbyu.
Gayunman, pumayag si Kris na ibahagi ng Cabinet Files ang madalas niyang sabihin noong wala pa silang vlog ni Katrina, na hindi “for content” lamang ang kanilang pagbabalikan bilang magkarelasyon.
Read: Kris Lawrence, Katrina Halili officially back together
KRIS LAWRENCE'S DREAM IS NOW A REALITY
Sa mga off-the-record na pag-uusap noon ng Cabinet Files at ni Kris, paulit-ulit niyang sinasabi na kung mayroon man siyang dating karelasyon na gusto niyang balikan, si Katrina lamang iyon at wala nang iba.
Kaya nang kumpirmahin nina Katrina at Kris sa kanilang vlog noong nakaraang buwan na muli na silang may relasyon, makalipas ang maraming taon ng paghihiwalay, hindi na nagtaka ang Cabinet Files.
Ang pagbabalikan nila ni Katrina ang matagal nang pangarap ni Kris — isang bagay na tila imposibleng mangyari noon dahil may kanya-kanya na silang buhay.
Ngunit tila tadhana na ang gumawa ng paraan para muling mabuo ang pamilya ni Kris.
Sa ngayon, hindi maipagkakailang maligaya si Kris sa piling ni Katrina at ng kanilang anak.
Read: Kris Lawrence elusive about second chance with Katrina Halili