“Huge star” mula sa Pilipinas, marami nang nagawang palabas sa telebisyon, at mukha ng major international luxury brands ang pakilala kay Sarah Lahbati sa Netflix reality series na The Parisian Agency: Exclusive Properties.
Mapapanood si Sarah sa Episode 3 ng Season 6 ng programa ni Valentin Kretz, ang French luxury real estate broker at TV personality na tinulungan siya sa paghahanap ng apartment sa Paris, France.
Ang misis ni Valentin ay ang France-based Filipino fashion designer na si Charina Sarte.
Magkaibigan sina Sarah at si Charina kaya ang fashion designer ang naging instrumento sa paglabas ng aktres sa reality series ni Valentin.
Pinuri ang special appearance ni Sarah sa Parisian Agency dahil sa kanyang matatas na pagsasalita ng French language.
Hindi kataka-takang fluent sa French si Sarah dahil lumaki siya sa Geneva, Switzerland.
Pilipina ang ina ni Sarah at Moroccan ang kanyang ama.
French ang pangunahing salita sa Geneva.
Read: Arnel Pineda reveals he tried to retire as vocalist of Journey
SARAH LAHBATI LOOKING FOR AN APARTMENT IN PARIS
Ibinida ni Sarah kay Valentin na limang shows sa isang araw ang kanyang pinupuntahan sa tuwing dumadalo siya sa Paris Fashion Week.
Nakalaan lamang daw ang panahon niya sa mga anak na sina Zion at Kai kapag magkakasama sila.
Isang apartment na malapit sa mga unibersidad ang hinahanap ni Sarah dahil pangarap nitong makapag-aral sa Paris ang mga anak nila ng kanyang estranged husband na si Richard Gutierrez.
Hindi binanggit ni Sarah ang pangalan ni Richard.
Pero sa isang bahagi ng pag-uusap nila ni Valentin, sinabi niyang hiwalay siya sa asawa nang ipakita ni Valentin ang walk-in closet para sa kanyang mga personal na gamit.
Nagustuhan ni Sarah ang fully-furnished apartment dahil, aniya, itong-ito ang kanyang estilo.
Nang itanong niya ang presyo, 4,750 million euros — mahigit sa 300 million sa Philippine currency ang katumbas — ang sagot ni Valentin.
Walang katiyakan kung bibilhin ni Sarah ang apartment.
Sa pagtatapos ng pag-uusap nila ni Valentin, sinabi ng aktres na pabalik na siya sa Pilipinas at nais niyang makita muna ng kanyang ina at mga anak niya ang Paris property na daan-daang milyong piso ang halaga.