Gaya ng kanyang pinsan, ang singer at lifestyle vlogger na si Claudine Co, mang-aawit din at music producer ang fashion designer na si Michael Ellis Co.
Si Ellis ay anak ng kontrobersyal at pinaghahanap na Ako Bicol party-list Representative na si Zaldy Co, na isinasangkot sa bilyun-bilyong pisong anomalya sa proyekto na flood control ng Department of Public Works and Highways (DPWH).
“Emerging young talent at budding visionary” ang pakilala kay Ellis nang ilunsad nito, sa pamamagitan ng fashion show na Memoirs of the Future, tampok ang mga koleksiyon niya bilang fashion designer sa ilalim ng kanyang brand o tatak na Archives noong Hulyo 2022.
Read: Revilla, Estrada, Villanueva, Co tagged by ex-DPWH official Henry Alcantara
ELLIS CO: ALSO THE RAPPER ELLIS G
Hindi lamang fashion designer si Ellis dahil kumakanta rin siya at ginagamit niya bilang rapper ang screen name na Ellis G.
Mapapanood sa YouTube channel ni Ellis, na meron pa lamang na 337 subscribers, ang mga kantang inilunsad niya noong Pebrero 2022: "Black Lexus," "Big Money," at "Shangri-La."
Hindi maipagkakailang tumutugma ang mga titulong ito sa marangyang pamumuhay ng kanyang pamilya at sa testimonya ni dismissed DPWH Bulacan first assistant district engineer Brice Hernandez sa sinumpaang testimonya nito sa Senate Blue Ribbon Committee inquiry noong Martes, Setyembre 23, 2025.
Isang luxury car ang Lexus.
Big Money, na halos isang bilyong piso ang halaga ang sinabi ni Hernandez na dinala nito at ng kanyang mga kasama sa penthouse unit ni Congressman Co sa Shangri-La Residences, The Fort, Taguig City.
Mula nang madiin ang pangalan ng kanyang ama sa flood control project scams, naging pribado na ang Facebook at Instagram accounts ni Ellis.
Naging popular search ngayon sa social media si Ellis dahil sa pagbubulgar ni Hernandez tungkol sa bilyong pisong dinala nila ng mga kasama niya sa Shangri-La penthouse residence ni Zaldy Co, na hindi pa matukoy ang kinaroroonan sa kasalukuyan mula nang umalis patungo sa Amerika noong Hulyo 2025.
Read: Claudine Co, muling napagdiskitahan ng netizens dahil kay Zaldy Co
HOTEL ST. ELLIS IN LEGAZPI CITY
Ilang mga residente naman ng Legazpi City sa Albay, Bicol, ang nagsabing ang pamilya Co ang may-ari ng Hotel St. Ellis, na ipinangalan umano sa young singer at fashion designer.
Nanguna si Congressman Co sa thanksgiving party at oathtaking ceremony ng local candidates na nanalo sa halalan noong May 12, 2025, at idinaos ang pagtitipon sa Hotel St. Ellis.
Si Congressman Co ang founder ng Sunwest Construction and Development Corporation, ang kompanyang kasali sa listahan ng Top 15 construction companies na isiniwalat ni President Ferdinand Marcos Jr. na sangkot sa diumano’y maanomalyang flood control projects.
Tila may penchant o hilig ang mga may-ari ng mga construction company na gawing santo ang kanilang mga anak.
Hotel St. Ellis ang pangalan ng Legazpi hotel ng pamilya Co.
St. Gerrard, St. Timothy, at St. Matthew naman ang construction business names ng mag-asawang Sarah at Culree Discaya na hango naman mula sa pangalan ng mga anak nila.
Read: Revilla, Estrada, Villanueva, Co deny receiving flood control kickbacks