Ang mga video ng iba’t ibang eksena mula sa kilos-protesta laban sa korapsyon na idinaos sa Luneta sa Maynila at EDSA sa Quezon City ang ipinakita sa closing billboard sa live newscast sa 24 Oras ngayong Lunes ng gabi, Setyembre 21, 2025.
Maraming manonood ang naantig ang damdamin sa pagbibigay-pugay ng 24 Oras sa mga nakiisa sa kilos-protesta at sa cut-to-cut scene videos.
Read: Placards, punchlines steal the scene at Trillion Peso march
Nilapatan ito ng "Kapangyarihan," ang kanta ng Ben&Ben at SB19 na isa nang protest anthem dahil sa mensahe ng lyrics na sumasalamin sa malaganap na korapsyon na nangyayari sa ating bansa.
Inawit nina Paolo at Miguel Guico ng Ben&Ben ang "Kapangyarihan" nang umakyat sila sa entablado ng kilos-protesta sa EDSA noong Linggo.
Ginamit din ang "Kapangyarihan" bilang opening theme song ng Pulang Araw (Hulyo 29-Disyembre 27, 2024), ang war drama series ng GMA-7 na pinangunahan nina Alden Richards at Barbie Forteza.
Read: Vice Ganda to corrupt politicians: "P.I. ninyo!"
THE ORIGIN OF "KAPANGYARIHAN"
Para sa kaalaman ng lahat, isinulat nina Paolo at Miguel ang "Kapangyarihan" bilang reaksiyon nila sa kaso ng pagpatay ng pulis na si Jonel Nuezca sa mag-inang Sonia at Frank Gregorio ng Paniqui, Tarlac, noong Disyembre 2020.
Ang pagpaslang sa mag-inang Gregorio ang isa sa pinakamalaking balita noong 2020.
Aktuwal na nakunan ng video ang pamamaril sa kanila ni Nuezca, na nahatulan ng habambuhay na pagkakakulong sa New Bilibid Prison sa Muntinlupa City noong Agosto 26, 2021.
Read: Brutal na pagpatay ng pulis sa mag-ina sa Tarlac, nakakagalit
Hindi namalagi si Nuezca nang matagal sa bilangguan dahil makaraan lamang ang tatlong buwan, inatake siya sa puso na sanhi ng kanyang kamatayan sa edad na 47 noong Nobyembre 30, 2021.
Read: Killer ex-cop na si Jonel Nuezca pumanaw sa kulungan
Noong Agosto 29, 2021, ilang araw matapos hatulan si Nuezca ng reclusion perpetua ng Paniqui Regional Trial Court, isang bagong bersyon ng "Kapangyarihan" ang inilabas ng Ben&Ben.
Tampok dito ang P-pop boy band na SB19.
Si Pablo Nase ng SB19 ang nagdagdag ng ilang linya para sa bagong bersyon ng "Kapangyarihan."
Limang taon na ang nakararaan pero akmang-akma pa rin ang mensahe ng "Kapangyarihan" sa mga kaganapan ngayon sa Pilipinas kaya muling nag-aaklas ang mga Pilipino sa mapayapang pamamaraan.
THE LYRICS OF "KAPANGYARIHAN"
Akala niyo ba, ang kapangyarihan
Ay nasa inyo? Sino ba kayo?
Di naman kami nagkulang
Sa aming pag-uunawa
Di ka namin isusuka
Kung hindi ka pa sukdulan
Huwag niyong tapakan ang katarungan
Akala niyo ba, ang kapangyarihan
Ay nasa inyo? Sino ba kayo?
Magwawagi ang katotohanan
Ang kadiliman ay ibabagsak
Nagsisilbi ka dapat
Nagsisilbi ka dapat
Di ba dapat ikaw ang nagsisilbi sa 'min?
Bakit tila kami'y nananaginip nang gising?
Ang bawat pighati na dala, dagdag bigat damdamin
Pipilitin na pasanin hanggang sa mga mata niyo'y mamulat
Magising sa sigaw na sumasalamin
Sa sumpa niyong magsilbi sa amin
Tuluyang nawalan ng bisa
Ba't sinaulo't di sinapuso bilang ng buhay ng tao?
Kayong mga hari-harian, pagkalaki na ng mga ulo
Wag n'yong kalilimutan na hawak-hawak namin ang inyong trono
Nadidinig n'yo pa ba ko?
Pangako'y napako dahil sa korona sa ulo niyo
Di na magpapaalipin pa sa mga rehas mo
Di mabubuwag ng kahit anumang sindak ang katotohanang 'to
Ibon na malayang lumipad
Di mo na makukulong
Akala niyo ba, ang kapangyarihan
Ay nasa inyo? Sino ba kayo?
Magwawagi ang katotohanan
Ang kadiliman ay ibabagsak
Akala niyo ba, ang kapangyarihan
Ay nasa inyo? Sino ba kayo?
Magwawagi ang katotohanan
Ang kadiliman ay ibabagsak
Nagsisilbi ka dapat
Nagsisilbi ka dapat
Katotohanan ang dapat mamuno (nagsisilbi ka dapat)
Sa namumuno sa mamamayan (nagsisilbi ka dapat)
Makatarungan ang dapat mamuno (nagsisilbi ka dapat)
Sa namumuno sa mamamayan (nagsisilbi ka dapat)
Nagsisilbi ka dapat
Nagsisilbi ka dapat