Binanggit ni Department of Interior and Local Government (DILG) Secretary Jonvic Remulla ang mga Netflix action series na One Piece at Lupin sa panayam sa kanya ng ANC.
Ito ay kaugnay ng mga karahasang nangyari sa anti-corruption rally noong Linggo ng gabi, Setyembre 21, 2025 sa Recto Avenue, Manila.
Read: Karahasan sumiklab sa araw ng kilos-protesta
Pahayag ni Remulla: “Ang nakita namin, meron silang tinitingnan na website, yung One Piece, parang Lupin, na nakaitim silang lahat.
"Sinusunod nila yung pattern na ginawa sa Nepal, ginawa sa Indonesia. Pero nagmasid naman kami. Nakita namin na disorganized.”
Itinanggi naman ni Remulla sa isang panayam na may nasawi sa kaguluhang naganap sa Recto Avenue.
Tinawag ni Remulla na "fake news" ang kumakalat sa social media, pero inamin niyang may mga nasaktan sa mga lumahok sa kilos-protesta sa Recto.
Itinanggi rin ni Manila City Mayor Isko Moreno na may namatay sa Recto riot.
Ayon kay Moreno, walang iniulat na nagbuwis ng buhay sa karahasang nangyari.
“Salamat sa Diyos, both to the PNP and the rallyist, wala naman [namatay]. Kaya lang, meron akong isang pulis na nalagay sa alanganin ang buhay, medyo stable na naman siya,” sabi ni Moreno.
Personal na pumunta si Moreno sa Recto noong Linggo para tingnan ang mga pag-aari ng gobyerno at mga pribadong ari-ariang winasak ng mga demonstrador.
Read: Vice Ganda to corrupt politicians: "P.I. ninyo!"
DOH CONFIRMS ONE DEATH
Magkaiba ang mga pahayag nina Remulla at Moreno at ng Department of Health (DOH).
Ngayong Lunes, Setyembre 22, kinumpirma ng government agency na isa ang namatay at 48 ang mga nasaktan na isinugod sa Jose R. Reyes Memorial Medical Center matapos ang karahasan sa Recto na humantong sa paninira ng government at private properties.
Sinabi ng DOH na hindi pa nakikilala ang lalaking sinaksak at dead on arrival nang dalhin sa ospital.
Tiniyak ng DOH na walang sisingilin sa pagpapagamot ng mga pasyente dahil sakop daw ito ng Zero Balance Billing na ipinag-utos ni President Ferdinand Marcos Jr.
Read: Celebrities spotted at September 21 protests in Luneta, EDSA