Habang nagaganap ngayong Linggo nang hapon, Setyembre 21,2025, ang mapayapang kilos-protesta sa People Power Monument sa EDSA Shrine, Quezon City, sumiklab ang karahasan sa Ayala Bridge, Manila, dahil sa mga demonstrador na nagtangkang marating at mapasok ang palasyo ng Malacañang.
Nangyari ang insidente sa Maynila habang papunta ang grupo nina Anne Curtis at Vice Ganda sa People Power Monument.
Napanood sa live broadcast ng GMA Integrated News ang paggigirian ng mga demonstrador at ng mga pulis na nakabantay sa lahat ng mga kalsada patungo sa Malacañang.
Naging marahas ang kilos-protesta sa Ayala Bridge dahil pagsugod at pambabato ng mga demonstrador sa mga pulis na pinaiiral noon ang maximum tolerance.
Sinunog ng mga demonstrador ang gulong ng isang container van na ginamit nila bilang pangsangga habang binabato nila ng iba’t ibang bagay ang mga pulis.
May mga nasugatang pulis at may mga dinakip na demonstrador dahil sa kaguluhan na inumpisahan nila.
Naiwasan ang mas malaking panganib nang maapula ng mga tauhan ng Bureau of Fire Protection (BFP) ang nasusunog na gulong ng container van.
Patuloy na tinututukan at binabantayan ng mga tauhan ng Philippine National Police ang Mendiola Street at ang mga kalye sa paligid ng Malacañang Palace dahil dito patungo ang mga dumalo sa kilos-protesta sa Luneta Park.