Hindi magdadalawang-isip ang Viva Artists Agency (VAA) na magsampa ng kaso laban sa sinumang patuloy na nagkakalat ng mga paninira laban sa kanilang contract star na si Ashtine Olviga.
Sa opisyal na pahayag na inilabas ng VAA, malinaw ang kanilang babala at paalala para sa mga taong mapatutunayang sinisiraan ang lead actress ng phenomenal hit series na Mutya ng Section E.
Ipinaalala ng pamunuan ng VAA na isang seryosong krimen ang online libel at hindi nila hinahayaan o pinapayagan ang anumang mga paninira na walang basehan at ebidensya.
“Online libel is a serious crime and punishable by law. We as the management of Ashtine will take the necessary legal action for any statements, narratives, or allegations that might tarnish her reputation.
“We do not condone these acts, specially without any evidence. We will hold those accountable liable to the maximum extent possible under the law,” ang kabuuang pahayag ng VAA.
Mula nang makilala si Ashtine dahil sa partisipasyon nito sa Mutya ng Section E., dumami ang bilang ng kanyang mga tagahanga na kabilang sa mga nagtatanggol sa kanya kapag nasasangkot siya sa mga isyu.
Ikinatuwa ng mga tagasuporta ni Ashtine ang paalala at babala na inilabas ng VAA dahil ito ang kasagutan sa kanilang panawagan na “Protect Ashtine at all cost.”
Kabilang ang local supporters at Indonesian fans ni Ashtine sa mga nababahala nang husto sa online bashing at diumano’y mga walang katotohanang kuwento na kumakalat laban sa kanya.
Kaya pinahahalagahan nila ang official statement ng talent management agency na namamahala sa career ng aktres na kanilang iniidolo.