Bilang pagpupugay at paggunita sa mga alaala ni National Artist for Film and Broadcast Arts Nora Aunor, itatanghal sa mga piling sinehan ang tatlo sa mga pelikula niyang iprinodyus ng Viva Films.
Read: Mga di malilimutang kaganapan sa pagpanaw ni Nora Aunor
The Superstar Collection: A Tribute to the National Artist ang pamagat ng muling pagpapalabas ng mga hindi malilimutan at award-winning movies ng aktres.
Kabilang dito ang Beloved, na unang pinalabas noong Hunyo 27, 1985. Kasama ni Nora rito sina Christopher de Leon at Hilda Koronel.
Mapapanood din ang The Flor Contemplacion Story na ni-release noong Hunyo 7, 1995, at nagbigay kay Nora ng Best Actress Award mula sa 1995 Cairo International Film Festival ng Egypt.
Kasama rin ang Mananambal, ang huling proyekto niya na pinalabas noong Pebrero 19, 2025.
Mapapanood ang mga ito sa halagang PHP150 sa piling SM Malls at Robinsons Malls, pati na rin sa Gateway Mall at Fisherman Mall.
Hindi na nakadalo si Nora sa media conference para sa Mananambal noong Pebrero 6, 2025, dahil sa kanyang hindi mabuting pakiramdam.
NORA AUNOR FILMS PRODUCED BY VIVA
Bukod sa Beloved at The Flor Contemplacion, ang Muling Umawit ang Puso (1995), Bakit May Kahapon Pa? (1996) at Tinik Sa Dibdib (1985) ang tatlo pa sa mga proyekto ng Viva Films na pinagbidahan ni Nora.
Ang Muling Umawit ang Puso—na official entry sa 21st Metro Manila Film Festival noong Disyembre 1995—ang pelikulang pinagsamahan ni Nora at ng kanyang anak na si Ian de Leon.
Si Joel Lamangan ang direktor ng Muling Umawit ang Puso.
At base sa kanyang kuwento, nahirapan si Ian na umarte dahil pinanonood ito ng nanay.
Pinaalis ni Joel si Nora sa set, nawala ang kaba ni Ian, kaya puro take one na ang mga eksena nito.
Ang Muling Umawit ang Puso ang humakot ng mga tropeo sa Gabi ng Parangal ng 21st Metro Manila Film Festival, kabilang ang best actress award para kay Nora, best director para kay Joel, at best picture ang kanilang pelikula.
