Kasado na ang kauna-unahan at pinakamalaking fan meet ng cast ng Ang Mutya ng Section E at magaganap ito sa May 1, 2025.
Ang phenomenal success ng Viva One original series—na pinangungunahan nina Andres Muhlach, Rabin Angeles, at Ashtine Olviga—ang dahilan kaya nagdesisyon ang Viva Entertainment na magdaos ng fan meet.
Maaga nilang inanunsyo ito para makapaghanda nang husto ang mga tagahanga na tumatangkilik sa Ang Mutya ng Section E.
Kasabay ng pagsikat ng lead stars ng programa ang popularidad ni Amiel Sol, ang indie singer-songwriter na sumulat at umawit ng "Sa Bawat Sandali," ang original soundtrack ng show.
As of this writing, meron na itong 24.5 million streams sa Spotify, 5.4 million views ang music video, pang-apat sa listahan ng YouTube Music Trending, at nangunguna sa Spotify’s Daily Top Songs PH chart.
Hindi makapaniwala si Amiel sa tagumpay ng "Sa Bawat Sandali" at ito ang kanyang ipinagtapat nang humarap siya sa mga miyembro ng entertainment press.
“Hindi ko akalain na mangyayari ito sa buhay ko,” ang sabi ni Amiel.
“Sobrang thankful ko, sobrang surprised ko kasi hindi ko naman ine-expect na magiging ganito, magta-top sa charts ang kanta ko.
“Nung isinulat ko kasi ito, parang no expectations. Just like all of my other songs, isinulat ko lang ang kantang ito kasi yun ang nararamdaman ko.
"Sobrang thankful lang ako na umabot sa ganito,” lahad pa ni Amiel na BS Mathematics graduate mula sa University of The Philippines bago pumirma ng kontrata sa Viva Records.
Naranasan din ni Amiel na maging bahagi ng corporate world pero sa ngayon, full-time musician na siya dahil sa mainit na pagtanggap ng publiko sa kanyang mga komposisyon.
“I graduated college, had a day job, left my day job, pursued music full-time,” ang sabi ni Amiel.
Ang "Di Na Akin" at "Ikaw Lang ang Patutunguhan" ang mga breakout hit ni Amiel na isinilang sa Araw ng mga Puso noong 1999, may twin brother, at mahusay tumugtog ng piano.