Napaluha ang former child star na si Kenken Nuyad sa ginanap na media conference ng pelikulang In Thy Name nang ibahagi niya ang kahirapang dinanas ng kanyang pamilya noong panahon ng pandemya.
Napukaw ni Kenken ang interes at atensiyon ng lahat, lalo na ng kanyang co-star na si Jerome Ponce, na taimtim na pinakinggan ang bawat salitang binitiwan ni Kenken sa presscon ng pelikulang naganap nitong Huwebes ng hapon, Pebrero 6, 2025.
Read: Child actor Kenken Nuyad, nagmakaawang humingi ng tulong matapos ang pinsala ng Typhoon Ulysses
Naantig ang damdamin ng mga nakikinig sa malungkot na kuwento ni Kenken, na umaasang ang In Thy Name ang hudyat ng muling pagiging aktibo niya sa pag-arte.
Lahad ni Kenken: “Nung dumating po yung pandemic, napakahirap po ng talaga ng buhay ko po.
"Even yung father ko, nawalan ng trabaho, hindi po namin alam kung saan kami kukuha ng mga source.
"Kaya nung dumating na po yung opportunity na to, ito na po yung sign na baka bumalik na po ako sa industry.”
Namuo ang mga luha sa mga mata ni Kenken habang pinipilit pigilan ang pag-iyak nang pasamalamatan niya ang mga taong naging instrumento para makabalik siya sa industriya.
Saad niya: “Marami pa akong gustong pasalamatan, lalo na po si Direk Rommel [Ruiz], Direk Caesar [Soriano], at sa lahat po ng nag-contact sa akin.
"Kasi po, this film po is malaking tulong sa akin.
“Natulungan po kasi ako nito ng [In Thy Name] financially, at saka po nakagawa po ako ng karakter na nagpabago sa buhay ko.
“Challenging po sa akin kasi mahirap po talagang gampanan yung role ko po na isang bata na pari na nagkaroon ng good relationship sa Panginoon, kaya napaka-grateful kong tinanggap ko po ang film na ito."
Read: McCoy de Leon, "pambawi" ang pagganap na pari sa In Thy Name sa kasamaan ni David sa Batang Quiapo.
AWKWARD AGE
Si Kenken ay premyadong child actor pero nawalan ng mga proyekto sa pelikula at telebisyon nang tumuntong siya sa alanganing edad o awkward age.
Maluwag sa loob na tinanggap ni Kenken ang masakit na katotohanan kaya nananalig siyang makababalik sa pag-arte dahil sa karakter na ginampanan niya sa In Thy Name.
“Alam po natin na yung awkward age ko, dumating sa teenage years, siyempre po mahirap po makakuha ng projects.
"Kaya kapag may auditions po, pinupursige ko po yon para kahit papaano po, ganitong age ko po, may projects ako na nagagawa,” hindi nawawalan ng pag-asang deklarasyon ni Kenken.
Kabilang sa mga naging proyekto ni Kenken bilang child actor ay ang mga teleseryeng Juan Tamad (2015), Trops (2017), Alyas Robin Hood (2017), at Kambal Karibal (2018).
Napabilang din siya sa mga pelikulang Liway (2018), School Service (2018), Sol Searching (2018), Ani (2019), Magikland (2020), Bekis On The Run (2021), at Resbak (2021).
Ipinagmalaki ni Kenken na with honors siya bilang Grade 11 student dahil pinagbubuti niya ang pag-aaral.