Kilala ang Wil To Win host na si Willie Revillame sa pamimigay ng mga jacket sa kanyang programa kaya hindi nakapagtatakang siya ang kinuha ng businessman na si Ben Chan bilang celebrity ambassador ng Bench jackets.
Natapos na ang pictorial ni Willie para sa bagong endorsement niya.
Inaasahang anumang araw ay makikita na ang kanyang mga billboard para sa clothing store chain ni Chan.
Read: Willie Revillame confirms run for senator in 2025 elections
HOW DID "BIGYAN NG JACKET YAN" START?
Tatak ni Willie ang pamumudmod ng mga jacket sa studio audience ng programa niya, pero marami ang hindi nakakaalam sa tunay na kuwento tungkol sa kanyang pamimigay ng nito.
Inilahad ni Willie sa Cabinet Files na nag-umpisa ang pagbibigay niya ng jacket sa Wowowee, ang kanyang dating noontime program sa ABS-CBN.
Kuwento niya: “May kaibigan si Boss Gabby Lopez [former ABS-CBN CEO and chairman] na babae na nanood ng Wowowee sa studio, balikbayan siya. Kasama niya ang kanyang nanay.
“Lumapit siya sa akin, sinabi niya na giniginaw ang nanay niya na matanda na. Nagtanong siya kung meron akong puwedeng ipahiram na shawl, shawl pa nga ang sinabi niya, hindi jacket.
“Tinawag ko si Owen [Ercia,dating floor director ng Wowowee]. On cam, sinabi ko sa kanya na, ‘Owen, bigyan ng jacket yan!”
Pagpapatuloy ni Willie, “Kinabukasan, nakatanggap kami ng tawag mula sa may-ari ng Hammerhead Jeans.
"Gusto niyang mag-sponsor sa show at mga jacket ang kanyang ipamimigay.
"Kaya mula noon, namimigay ng ako ng jacket, hindi lamang sa mga matatanda kundi pati sa lahat ng mga pumupunta sa studio."
Ipinagpatuloy ni Willie ang pamamahagi ng mga jacket nang lumipat siya sa TV5, GMA-7, All TV, at hanggang sa kanyang muling pagbabalik sa Kapatid network noong Hulyo 2024.
Read: Willie Revillame, napaiyak sa TV comeback
Kahit saan magpunta si Willie, jacket ang hinihingi mula sa kanya ng mga taong nakakahalubilo niya kaya hindi siya nauubusan ng mga ipinamimigay na jacket.
Sabi niya tungkol sa pamimigay ng jacket, “Dinadamitan at binibihisan mo ang mga matatanda, nagiging warm sila sa yo.
"Yung warmth ng tao, kapag warm sila sa yo, may pagmamahal kaya naisip ko yung ‘Bigyan ng jacket yan!’"
Read: Willie Revillame, PHP1B ang halaga ng bagong property sa BGC