Pormal nang naghain ng kanyang kandidatura bilang alkalde ng Maynila para sa halalan sa Mayo 2025 si Tutok To Win party-list representative at Dear SV host Sam Verzosa.
Naghain siya ng certificate of candidacy sa SM Manila nitong Linggo ng hapon, Oktubre 6, 2024.
Dinagsa ng libu-libong mga tagasuporta ni Sam ang mall kaya pinahinto sa pag-andar ang mga escalator para maiwasan ang sakuna.
Bago naghain ng certificate of candidacy si Sam, nagsimba muna siya sa Quiapo church. Mula rito, dumiretso siya sa SM Manila para salubungin ang kanyang naghihintay na ina na si Mrs. Niña Verzosa na kararating lamang mula sa Japan.
Read: Sam Verzosa, kumpirmadong tatakbo bilang Manila mayor
SAM VERZOSA'S MOTHER ON SON ENTERING POLITICS
Sa panayam ng Cabinet Files kay Mrs. Verzosa, ikinuwento nitong napilitan siyang putulin ang kanyang pagbabakasyon sa Japan para umuwi ng Pilipinas at masamahan ang anak sa pagsusumite ng kandidatura.
Inamin ni Mrs. Verzosa na tutol siya sa pagpasok ni Sam sa mundo na politika, pero hindi niya napigilan ang kanyang panganay.
Ibinahagi rin Mrs. Verzosa na noong maliit na bata pa si Sam ay sinabi nitong magiging congressman ito kaya hindi siya makapaniwalang magkakatotoo ang pahayag ng anak niya.
Si Sam ay kasalukuyang representative ng Tutok To Win party-list.
Ibinida pa ni Mrs. Verzosa na mabait umanong anak si Sam, mapagmahal na kapatid, likas na matulungin sa kapwa, at hindi nagbibigay ng problema.
Pero napagalitan daw niya ito nang umanib sa isang fraternity nang mag-aral noon sa University of the Philippines.
Read: Sam Verzosa, hindi itinanggi ang magarbong pamumuhay
SAM VERZOSA'S DECLARATION
Matapos maghain ng kandidatura, tumuloy si Sam sa Bonifacio Shrine sa tabi ng Manila City Hall.
Dito ay umalingawngaw ang kanyang malakas na boses at pahayag: “Pormal ko na pong tinatanggap ang hamon laban sa korapsyon. Ngayong araw, pormal na po tayong kandidato bilang mayor ng Maynila!
“Sa harap ng dambana ni Gat Andres Bonifacio, sisimulan natin ang rebolusyon, ang rebolusyon ng pagbabago!
“Ilalaban namin kayo hanggang dulo! Wala nang magugutom! Wala nang matutulog sa kalye!
"Wala nang mapapabayaan na mga senior citizen! Magdadala tayo ng trabaho at kabuhayan sa mga mahihirap!”'
Umulan ng orange confetti sa Bonifacio Shrine.
Lumikha ng mabagal na pagdaloy ng mga sasakyan ang mga taong nagtipun-tipon, may hawak na placards na may nakasulat na “SV, Oppa ng Maynila” at paulit-ulit na sumisigaw ng “ SV naman!”
Mahaba rin ang pila sa mga food stall na nagbibigay ng mga libreng siomai at tubig mula kay Sam.
Mula sa Bonifacio Shrine, nagpunta si Sam at ang kanyang mga tagasuporta sa Liwasang Bonifacio para sa free concert na alay niya sa publiko. Tinampukan ito nina Maui Taylor, Katya Santos, Heaven Peralejo, at Andrew E.
Inaasahang mahigpit na makakalaban ni Sam bilang mayor ng Maynila sa 2025 elections ang incumbent Manila mayor na si Honey Lacuña at si dating Manila mayor Isko Moreno.
Read: Sam Verzosa, mamahaling de-lata ang ipinamimigay sa mahihirap