Kanselado ang red-carpet premiere ng pelikulang 40 na nakatakda sanang mangyari sa Cinema 3 ng The Block ng SM North, ngayong Lunes ng gabi, Setyembre 2, 2024, dahil sa malakas na buhos ng ulan at pagbaha na hatid ni Typhoon Enteng.
Nagdesisyon ang Viva Films, ang producer ng 40, na ipagpaliban ang red-carpet premiere ng pelikulang pinagbibidahan nina Kiko Estrada at Cindy Miranda sa Martes, Setyembre 3, dahil sa masungit na lagay ng panahon.
Magbubukas sa mga sinehan ang 40, mula sa panulat at direksiyon ni Dado Lumibao, sa Miyerkules, Setyembre 4.
R13 ang classification ang ibinigay ng MTRCB sa romance-drama movie nina Kiko at Cindy.
WIL TO WIN TO AIR LIVE
Si Cindy ang isa sa mga co-host ni Willie Revillame sa Wil To Win.
Pero kahit hindi matutuloy ang red-carpet premiere ng 40, live na mapapanood ngayong hapon sa TV5 ang programang kinabibilangan niya, sa kabila ng delubyong dala ni Typhoon Enteng.
Hindi na makansela ng TV5 management ang live telecast ng Wil To Win dahil maagang dumating sa Novaliches studio ng Kapatid Network ang 400 bilang ng mga tao na nagmula pa sa malalayong lugar at matagal nang nakaplano ang panonood ng game show ni Willie.
Nagpasya si Willie at ang TV5 na ituloy ang live broadcast ng Wil To Win ngayong Lunes para hindi madismaya at mabalewala ang pagod ng mga kababayan nating gumastos at naglaan ng panahon para lumuwas at mapanood ang kanilang paboritong programa.