Ibabalik ng GMA-7 ang Tanghalan ng Kampeon, ang singing competition na napanood sa nabanggit na network mula 1987 hanggang 1992.
Si Pilita Corrales at ang pumanaw na komedyanteng si Bert “Tawa” Marcelo ang mga host noon ng Tanghalan ng Kampeon.
Sa pagbabalik ng "Tanghalan ng Kampeon" sa Pebrero 12, 2024, sina Kim Atienza at Pokwang ang mga host.
Gagawing segment ang naturang patimpalak sa TikToClock, ang morning variety program ng Kapuso Network na natutunghayan bago ang Tahanang Pinakamasaya ng TAPE Inc.
Sanay na host ng mga singing competition si Pokwang dahil nahasa ito nang husto noong nagtatrabaho pa siya bilang stand-up comedienne sa Music Box, isa sa mga comedy bar na itinuturing na institusyon.
Ang direktor ng TikTokClock na si Louie Ignacio ang nag-anunsiyong dapat abangan ang mga panalong tinig sa pagbabalik ng "Tanghalan ng Kampeon," na isinalarawan niya bilang "classic '80s Kapuso singing competition."
Dalawang linggo na ang nakararaan buhat nang magpatawag ang GMA-7 ng audition tuwing Miyerkules at Huwebes para sa mga nagnanais sumali sa Tanghalan ng Kampeon.
Sadyang mahihilig sa pagkanta ang mga Pilipino kaya marami ang lumahok sa audition at inaasahang madaragdagan ito kapag nag-umpisa na ang "Tanghalan ng Kampeon" sa Pebrero 12, 2024.
Dahil sa nalalapit na pagbabalik ng GMA-7 sa "Tanghalan ng Kampeon," nagkaroon ng mga haka-hakang maaaring inihahanda ang TikToClock bilang kapalit ng Tahanang Pinakamasaya kapag natapos sa Disyembre 2024 ang kasunduan sa pagitan ng TAPE Inc. at GMA Network Inc.