Sigurado na ang pagdating sa Pilipinas ni Miss Universe 2023 1st runner-up Anntonia Porsild ng Thailand.
Kilalang-kilala ng mga Pilipino si Anntonia dahil isa siya sa mga mahigpit na nakalaban ng Miss Universe Philippines 2023 Michelle Dee sa international beauty pageant na kanilang sinalihan, na naging instrumento para magkaroon sila ng malalim na pagkakaibigan.
Sa Instagram live ng dalawa noong Nobyembre 22, 2023, ibinalita ni Michelle ang plano ni Anntonia na pagbisita sa ating bansa, at mangyayari nga ito sa darating na Lunes, Enero 29, 2024.
Sandaling-sandali lamang ang pamamalagi ni Anntonia sa Pilipinas dahil babalik agad siya sa Thailand sa Miyerkules, Enero 31.
Mula nang maging magkaibigan ang dalawa, "Daddy" at "Mommy" ang term of endearment nina Anntonia at Michelle sa isa’t isa.
"PorDee" naman ang inimbentong tawag kina Anntonia at Michelle ng mga tagasuporta nilang bilib na bilib sa uri ng kanilang pagkakaibigan.
Sinabi ni Michelle sa isang panayam na isang "wonderful friendship" sa pagitan nila ni Anntonia ang nabuo sa kanilang partisipasyon sa 72nd Miss Universe.
Read: Michelle Dee nagsalita na tungkol sa pagbibigay-malisya sa closeness nila ni Anntonia Porsild
Mga pageant powerhouse ang Thailand at Pilipinas.
Sa tuwing idinaraos ang Miss Universe, madalas pinagkukumpara ang mga kandidata ng mga nabanggit na bansa.
Pero ipinakita nina Michelle at Anntonia na ang kanilang pagkakaibigan ang patunay na hindi sila apektado ng "pagsasabong" na ginagawa ng masusugid na tagahanga ng mga beauty pageant.
Nang bumalik si Michelle sa Pilipinas noong Nobyembre 25, 2023, nagpahiwatig siya tungkol sa mga proyektong magkasamang gagawin nila ni Anntonia, pero walang detalyeng ibinigay ang Pinay beauty queen.