Naglabas ng opisyal na pahayag ang Virtual Playground Talent Management Agency kaugnay ng sentimyento ni Miss Grand International Organization founder at president Nawat Itsaragrisil laban kay Miss Universe Philippines 2014 MJ Lastimosa.
Ang Virtual Playground ang namamahala sa career ni MJ.
Read: Miss Grand International founder calls Philippine rep Nikki de Moura "very unprofessional"
Disimuladong idineklara ni Nawat na persona non grata si MJ dahil hindi nito nagustuhan ang isang content sa The Secret Lounge with Mareng MJ, ang YouTube channel ng Pinay beauty queen.
Nasaktan si Nawat dahil napag-usapan ni MJ at ng transgender woman beauty queen na si Maki Gingoyon sa isang episode ng The Secret Lounge with Mareng MJ na ang Miss Grand Philippines ang worst pageant sa Pilipinas.
Si MJ ang nagtanong kay Maki kung ano itinuturing nitong worst pageant sa ating bansa.
Tawang-tawang sumagot ang kanyang bisita ng “Miss Grand.”
"Ano, International o Philippines?" sundot na tanong ng natatawa rin na si MJ.
Sagot ni Maki, “Philippines.”
Hindi ikinatuwa ni Nawat ang video na napanood kaya sinumbatan niya si MJ.
Isa-isang sinabi ni Nawat ang mga pabor na kanyang ibinigay noon sa Filipino beauty queen at nagdeklara siyang hindi na welcome si MJ na manood ng live show ng Miss Grand International.
Ang Virtual Playground Global Production ang producer ng The Secret Lounge with Mareng MJ.
Ang vice-president nitong si Glenn Mark Salamat ang nagpadala sa Cabinet Files ng kanilang opisyal na pahayag, isang indikasyon na ayaw nang patulan ng dating Miss Universe Philippines winner ang mga panunumbat ng Thai founder ng Miss Grand International.
Nakasaad din sa opisyal na pahayag ni Salamat ang ilang paglilinaw tungkol sa kontrobersiyal na video na ikinagalit ni Nawat.
“The Youtube program The Secret Lounge with Mareng MJ and Ms. Maki Gingoyon would like to issue an apology to Miss Grand Philippines Organization for the unsatisfactory opinion that came out during the aired episode last September 4, 2023 on the MJ Lastimosa Channel.
“The talk show has no intention of ruining or attack any pageants but only aims to feature pageant queens and kings’ — (the guests’) personal take on any pageant related topics.
“Nonetheless, as part of the pageant community, we promise to promote peace and cooperation to anything that would help develop our beloved industry in our succeeding episodes.”
Sinabi ni Salamat sa Cabinet Files na naganap ang panayam ni MJ kay Gingoyon noong Agosto 2023 at inilabas ito sa YouTube channel ng beauty queen noong September 2023, kaya maaaring nagkamali ng akala si Nawat na bagong upload lamang ang naturang video.
“The video came out NOT after Nikki’s performance in the last competition. This is purely Ms. Maki’s opinion which the show only aired,” giit ni Salamat.
Ang tinutukoy niyang "Nikki" ay si Nikki de Moura, ang opisyal na kandidata ng Pilipinas sa Miss Grand International 2023 na ginanap sa Ho Chi Minh City, Vietnam, noong Oktubre 25, 2023.
Kinondena ni Nawat si Nikki dahil sa diumano’y unprofessionalism na ipinamalas nito. Diumano, hindi nagpakita ng kooperasyon ang Filipina representative sa international pageant na nilahukan noong nakaraang buwan.