Humarap nitong Biyernes nang hapon, Setyembre 22, 2023, sa grupo ng entertainment writers ang ilan sa mga bumubuo sa GMA Pictures movie na Firefly.
Kinumpirma sa press ni GMA Pictures Senior Vice-President at First Vice-President for Public Affairs Nessa Valdellon ang hangarin nilang maging opisyal na kalahok sa 2023 Metro Manila Film Festival (MMFF) ang pelikula.
Ang Firefly ay sa ilalim ng direksyon ni Zig Dulay, isinulat ni Angeli Atienza, at pinagbibidahan nina Alessandra de Rossi at ng child actor na si Euwenn Mikaell.
“Local film offerings haven’t been doing well the entire 2023, but we think that the upcoming big films... sometimes it's casting and sometimes it’s a big story.
"So we’re expecting that the upcoming Star Cinema [movie] will do well. And in the next month, there’s a GMA Pictures collab with Cornerstone and Myriad Studio, this is the Five Break-Ups and a Romance of Alden Richards and Julia Montes and we’re expecting that to do well.
"And we do think that all of the entries, so far, that have big chance of making it sa MMFF, parang ang gaganda. So we think that the audience will come back for Christmas for the festival and we hope they would be able to watch Firefly at the time,“ positibong pahayag ni Valdellon.
Tungkol sa relasyon ng mag-ina ang kuwento ng Firefly at si Atienza ang nagpaliwanag sa naging inspirasyon niya sa paglikha sa mga karakter na ginampanan nina Alessandra at Euwenn.
“As a mother, lagi mong iniisip kung ano yung iiwan mo sa mga anak mo. Kung ano yung kakapitan nila kapag nawala ka.
“Na-realize ko yan sa anak ko kasi naniniwala siya kahit ano ang sabihin ko. So dapat something to inspire and arm your children kapag sila na lang,” ang sabi ni Atienza.
Nang ialok kay Alessandra ang Firefly, tinanggap niya agad ang proyekto dahil bukod sa maganda ang kuwento, makakatrabaho niya muli ang kanyang kaibigan, ang direktor na si Zig Dulay.
“Matagal ko nang gustong gumawa ng pelikula na may bida na bata na touching at heart-warming. So sabi ko, perfect ito. Saka maganda talaga yung kuwento,” pahayag ni Alessandra na napanindigan ang desisyon noon na huwag nang tumanggap ng kontrabida roles dahil nakakaapekto ito sa emosyon niya.
“Sumasama ang katawan ko kasi lagi kang galit, hindi ka naman nagagalit in real life so meron kang mga acidity, nagpapa-palpitate ako, every other day kasi [ang taping]. Sabi ko, ayoko na nang ganito.
"Nung itinigil ko siya, nawala lahat [ng masamang pakiramdam]. Pati yung minsan may konting kaya kong magsungit kapag nabigla before, wala pala. It’s inside you lang,” rebelasyon ni Alessandra.
Nagkaroon ng magandang kapalit ang pangako niya sa sarili na hinding-hindi na tatanggap ng kontrabida roles sa TV man o pelikula, dahil sa phenomenal success ng Kita-Kita, ang romantic comedy movie nila ni Empoy Marquez noong 2017.
“Nung nag-stop ako na magkontrabida na ayoko na, sumabog yung Kita-Kita. Sobrang galing ng timing. Hindi ko naman naisip na ganoon ang puwedeng mangyari and then nangyari siya, so may maniniwala na sa ’yo ngayon na puwede kang ibenta.
“Kasi before, talagang no lahat. Even before Kita-Kita was made, hirap-hirap na ako sa [mga] producer dahil no lahat.
“Mahirap talaga but when it happened, parang, 'Uy puwede, a.' Parang tinalikuran mo siya, binigyan ka ng different direction,” ang nakangiting pagbabalik-alaala ni Alessandra.