Kapangalan, kaedad, at kasing-tangkad ni Miss Universe Philippines 2023 Michelle Dee ang kandidata ng Guatemala sa Miss Universe 2023 na si Michelle Cohn.
Kinoronahan si Cohn noong August 6, at isa siya sa mga makakalaban ni Dee sa 72nd Miss Universe na magaganap sa El Salvador sa November 18, 2023.
Tiyak pag-uusapan si Cohn sa paglahok nito sa Miss Universe 2023 dahil sa kasaysayan ng patimpalak, siya ang kauna-unahang kandidatang kasali na may asawa at dalawang anak.
Gaya ni Dee, professional model at TV host si Cohn.
Maligayang-maligaya ang Guatemalan beauty queen dahil sa kabila ng pagiging ganap na ina, matutupad ang pangarap niyang maging kinatawan ng kanilang bansa sa Miss Universe.
“I feel so excited!!! A little over a year ago I would have thought this was impossible and today I am here looking to be the first mother to represent Guatemala to the universe.
“Here I am today, once again proving what we as women can accomplish,” pahayag ni Cohn noong nakaraang buwan nang makumpirma niyang kasali siya sa listahan ng mga opisyal na kandidata sa Miss Universe Guatemala 2023.
Ito naman ang reaksiyon niya nang mapanalunan ang korona noong August 6, 2023:
“Perseverance and consistent work is the key to success, thank you God, my opportunity is here, and it came when it had to.
“THANK YOU GUATEMALA I feel your immense love. Working since day one to prove what Guatemalan people are made of... let's go for MORE.”
Kabilang ang kanyang asawa na si Andres Matheu sa mga pinasalamatan niya.
Tulad ni Dee, pageant veteran si Cohn dahil ito ang kumatawan sa Guatemala sa Miss Grand International noong 2013, pero hindi pinalad na magkaroon ng puwesto.
Sumali rin siya at itinanghal na third runner-up sa Miss America Latina del Mundo 2013.