Binawian ng buhay ngayong Linggo, July 16, 2023, ang former teen star turned television/movie director na si Ricky Rivero sa edad na 51.
Ang tiyo ni Ricky na si Phillip Salvador ang nagkumpirma sa Philippine Entertainment Portal tungkol sa pagpanaw ng kanyang pamangkin.
Nagkaroon ng stroke si Ricky noong May 2023, at naratay sa Philippine Heart Center.
Sa hospital actually siya nag-birthday noong May 7, the same day na nagbigay siya ng update sa social media tungkol sa kanyang kundisyon.
Aniya, "slightly paralisado pa rin kaliwang bahagi ng katawan ko at di pa ako nakakalakad."
Read: Actor-director Ricky Rivero suffers heart attack
Unang na-confine si Ricky sa nabanggit na pagamutan noong August 2015 dahil sa heart attack kaya sumailalim siya sa angioplasty procedure.
Nakatakdang iburol ang mga labi ni Ricky sa Loyola Memorial Chapels sa Commonwealth Avenue, Quezon City, at plano ng mga naulila niya na ipa-cremate siya pagkatapos ng apat na araw na paglalamay sa kanya.
RICKY RIVERO PART OF SALVADOR CLAN
Anak si Ricky ni Tess Salvador, ang kapatid ni Phillip.
Kapatid niya sa ina si Marco Salvador, ang dating aktor na ama ni Andrei Sison, ang Sparkle GMA Artist Center contract star na namatay dahil sa vehicular accident noong March 24, 2023.
Read: Sparkle Teens recall fondest memories with the late Andrei Sison
Labis na ipinagluksa ni Ricky ang pagkawala ng kanyang pamangkin sa murang edad na 17.
RICKY RIVERO'S NOTABLE PROJECTS
Nagsimula ang acting career ni Ricky bilang child actor, at noong 1986, inilunsad siya bilang isa sa mga bida ng Ninja Kids and the Samurai Sword ng Viva Films.
Naging mainstay din si Ricky ng That’s Entertainment, mula January 1986 hanggang May 1996, ang youth-oriented television program ng GMA-7.
Bukod sa pagganap ng character roles sa mga pelikula at television series, nakilala si Ricky bilang direktor ng mga programa ng ABS-CBN.
Ilan sa mga TV series kung saan naging unit director siya ay Forevermore (2014) nina Liza Soberano at Ernique Gil, Mula Sa Puso (2011) nina Lauren Young, JM De Guzman and Enrique Gil, at Kokey (2007).
Naging assistant director naman siya ng matalik niyang kaibigan na si Wenn Deramas+ sa mga pelikulang Ang Tanging Ina Mo: Last Na 'To (2010), Moron 5 and the Crying Lady (2012), This Guy's In Love With You Mare (2012), The Amazing Praybeyt Benjamin (2014), kung saan kabilang din siya sa cast.
Ang huli niyang project na siya mismo main director ay ang pelikulang D' Aswang Slayerz, na ipinalabas nitong February 2023.