Nagsimula nang tumanggap ang Bininbing Pilipinas Charities Inc. (BPCI) ng mga aplikante para sa 2023 edition ng Binibining Pilipinas.
Sa January 31, 2023 ang huling araw ng pagsusumite ng application form ng mga kababaihang nangangarap magkaroon ng beauty title at maging kinatawan ng ating bansa sa mga international beauty pageant.
Pero nabahiran ng kontrobersiya ang itinuturing na prestihiyosong beauty pageant sa Pilipinas dahil sa isang bahagi ng Certification and Warranty of Information/Statements nito.
Nakasaad dito: “I am in good health, psychological and physical health, and that I have never been sick or have been hospitalized for Cancer, Epilepsy, HIV, AIDS, any heart ailment, a disease involving the gastrointestinal system or any other disease that will impair my mental, psychological and/or ph health or condition.”
Umani ito ng kritisismo mula sa netizens.
Ayon sa kanila, isang uri ng diskriminasyon, partikular ang HIV, para sa mga Pilipino na hindi matanggap ang criteria na BPCI para sa aspiring beauty queens.
Kabilang ang HIV/AIDS awareness sa mga matatagal nang advocacy ng BPCI at ng past Miss Universe winners na sina Pia Wurtzbach (2015) at Catriona Gray (2018) kaya binabatikos at pinararatangan ng diskriminasyon ang naturang organisasyon.
Hinihikayat ng mga kritiko na huwag hayaan ng beauty pageant supporters na palampasin ang diumano’y diskriminasyon at hindi makataong trato ng BPCI sa mga taong positibo sa HIV/AIDS.