Umuwi ng Pilipinas ang U.S.-based Filipino-American movie producer na si Arsy Grindulo Jr. noong December 2, 2022 para dumalo sa premiere night ng Hollywood movie na A Mermaid for Christmas.
Ginanap ang premiere night sa SM Megamall Cinema noong Martes, December 6.
Read: Meet Arsy Grindulo Jr., the Pinoy "accidental movie producer" in Hollywood
Isa si Grindulo sa mga producer ng fantasy movie na nagbukas sa mga sinehan sa Pilipinas noong December.
Bumalik siya sa bansa para personal na ibigay ang mga parangal sa mga bata — na tinutulungan ng iba’t ibang mga charitable institution —na lumahok at nagwagi sa Magical Mermaid Art Contest at i-promote sa mga TV show ang A Mermaid for Christmas.
Si National Artist for Film and Broadcast Arts Ricky Lee ang isa sa mga sumuporta sa red-carpet premiere ng A Mermaid for Christmas.
Malaking sorpresa at karangalan ito para kay Grindulo.
“I am very honored and humbled that I met him personally. First time na nag-meet kami but I always hear about him,” pahayag ni Grindulo nang makausap siya ng Cabinet Files.
Hindi pa masabi ni Grindulo ang susunod na proyekto sa Amerika ng kanyang movie company dahil gusto muna niyang malaman ang magiging resulta sa box office ng A Mermaid for Christmas.
Ang Days of Our Lives actor na si Kyle Lowder at si Jessica Morris ang lead stars ng pelikula.
Kapwa hindi nakapunta sa Pilipinas ang dalawa para sa red-carpet premiere ng A Mermaid for Christmas dahil sa kanilang mga previous commitment sa U.S., kaya inimbitahan si Mermaid Amarie, ang Pinay mermaid na pinagkaguluhan ng mga tao na sinamantala ang pagkakataong magpakuha ng litrato na kasama siya.
Ang artist na si Anthony Caballero ang lumikha ng aqua blue mermaid costume ni Amarie na bumagay sa okasyon dahil nagkataong kulay asul din ang buntot ni Jessica sa Hollywood movie na pinagbidahan.
Silicone ang materyal ng mermaid tail na ginawa ni Anthony na nagkakahalaga ng P35,000 at ginamit ni Amarie sa premiere night ng A Mermaid for Christmas.
Mermaid Amarie with Anthony Caballero
May regular job si Amarie bilang customer support for sales sa isang kompanya, pero ang side job niya bilang professional mermaid ang nagbigay sa kanya ng oportunidad na lumabas sa pelikula, telebisyon, at maraming imbitasyon sa mga birthday party.
Si Amarie ang nagturo ng paglangoy ng mga sirena sa mga batang lumabas sa My Fairy Tail Love Story, ang 2018 fantasy movie ni Janella Salvador. Siya rin ang gumanap na double ni Elisse Joson sa "Ofishially Yours" episode ng Wansapanataym ng ABS-CBN.
Nagsimula ang fascination ni Amarie sa mga sirena at pagsusuot ng mga buntot nang mahilig siya sa scuba diving at matutong lumangoy sa edad na 30.
Malayo na ang narating ni Amarie bilang Pinay mermaid dahil nasubukan na niyang sumali at Manalo sa World Mermaid Championship na ginanap sa China noong 2019.