Makasaysayan ang simpleng paggunita ng Viva Entertainment, Inc. sa ika-41 anibersaryo ng kanilang kompanya.
Ngayong Biyernes ng hapon, November 11, 2022, inilunsad ng founder at chief executive officer (COO) ng Viva na si Vic del Rosario ang Wall of Fame, ang larawan ng mga artistang malaki ang kontribusyon sa Viva Films mula nang mag-umpisa ito noong November 1981.
Makikita ang Wall of Fame sa 7th floor office ng Viva sa Tektite Towers, Ortigas Center, Pasig City.
Kasama ni Boss Vic sa ribbon-cutting ceremony ng Wall of Fame ang kapatid niyang si Miss Tess Cruz, ang finance head ng Viva; at ang kanyang mga anak na si Viva Artists Agency head Veronique del Rosario-Corpus at Viva Creative head Val del Rosario; at Tony Ocampo, ang chief operating officer ng Viva Records at Records.
Hindi lamang ang top Viva stars ngayon na sina Sarah Geronimo at Anne Curtis ang binigyan ng pagpapahalaga sa Wall of Fame dahil nagbigay-pugay rin ang Viva sa mga veteran star na nagbigay ng karangalan sa kompanya sa pamamagitan ng mga award-winning performances.
Kabilang dito sina Phillip Salvador, Christopher de Leon, Vilma Santos, Nora Aunor, Hilda Koronel, Aga Muhlach, Robin Padilla, Dina Bonnevie, Nanette Medved, Donna Cruz, Cesar Montano, at Sharon Cuneta, ang unang contract star ng Viva Films.
Nagbigay-pugay rin ang Viva sa mga pumanaw na alagad ng sining na sina Eddie Garcia, Leroy Salvador, Cherie Gil, at Dindo Fernando.
Pumanaw si Dindo noong August 27, 1987 pero nananatiling buhay ang alaala dahil sa kanyang mahusay na pagganap sa Viva movies na Gaano Kadalas Ang Minsan?, Sana Bukas Pa ang Kahapon, Palabra de Honor, Beloved, Kailan Tama ang Mali, at walong pelikula pa.
Apatnapu’t isang (41) larawan ng mga pinahahalagahang Viva past and present stars ang masisilayan sa Wall of Fame bilang pagdiriwang sa 41st anniversary ng Viva.
Sa kanyang talumpati na tumagal lamang ng tatlumpo’t anim (36) na segundo, pinasalamatan ni Boss Vic ang lahat ng mga empleyado ng kompanyang itinatag niya.
“Maraming salamat! Forty-one years of Viva. Thank you, thank you.
"Hopefully more movies, more blockbusters and also, siyempre, mga bago nating negosyo like Vivamax, Viva Foods, Viva Kids… Viva Friends will be launched next year, so thank you sa lahat.
"Thank you. Forty-one years!" mensahe ni Boss Vic.