Dumalo ang Viva Artists Agency contract stars na sina Billy Crawford, Coleen Garcia, Cristine Reyes, at Marco Gumabao sa Thanksgiving Gala ng GMA Network na kasalukuyang ginaganap sa isang five-star hotel sa Taguig City, Sabado ng gabi, July 30, 2022.
Ang apat na Viva artists ay dating napapanood sa ABS-CBN.
Nag-umpisa ang pagiging artista ni Cristine nang sumali ito sa unang season ng StarStruck, ang reality-based artista search ng GMA-7 noong 2003.
Lumipat siya sa ABS-CBN noong 2008 at dito namayagpag nang husto ang kanyang acting career.
Nagkaroon ng mga espekulasyon tungkol sa posibleng pagbabalik ni Cristine at pagkakaroon ni Marco ng proyekto sa Kapuso Network dahil sa pagdalo nila sa Thanksgiving Gala ng GMA-7.
Magsisimula naman sa August 28 ang The Wall Philippines, ang game show ng Viva Television na dating natutunghayan sa TV5 pero mapapanood na sa Kapuso station tuwing Linggo ng hapon.
Si Billy ang host ng The Wall Philippines sa TV5, at siya pa rin ang emcee ng programa na inilipat ng Viva Television sa GMA-7 dahil bahagi ito ng pagsasanib-puwersa ng dalawang malalaking kompanya sa entertainment industry.
Read: GMA Network welcomes back Billy Crawford after 15 years
Walang conflict ang paglabas ni Billy sa Kapuso Network kahit mainstay siya ng Tropang LOL na ipinalalabas sa TV5, A2Z at Kapamilya Channel. Sa naturang programa lamang siya may kontrata, hindi sa Kapatid Network.
Nag-advance taping na si Billy para sa The Wall Philippines dahil nakatakda siyang umalis ng bansa sa August 15.
Pupunta sa Paris, France si Billy dahil contestant siya sa Season 12 ng Danse avex les Stars (Dance with the Stars) at mananatili siya sa naturang bansa hanggang October 15, 2022.