Parang eksena sa isang big-budgeted movie ang pagkikita ni former Senator Manny Villar at ng popular TV host na si Willie Revillame kahapon, May 31, 2022.
Pinag-usapan nila ang mga plano para sa nalalapit na pagbubukas ng Advanced Media Broadcasting System (AMBS), ang television network na pag-aari ng pamilya Villar.
Read: Richest Pinoy Manny Villar takes over ABS-CBN channels: A Timeline
Kasama ni Villar ang anak niyang si Las Piñas House Representative Camille Villar nang bumaba sila mula sa kanyang Bell 429 helicopter na lumapag sa helipad ng Tagaytay City residence ni Willie.
Naunang dumating ang TV host na sakay naman ng Bell 430 chopper niya bago sila tumuloy sa Crossing Café sa Daanghari Road, Cavite, para sa kanilang pag-uusap, kasali si AMBS President Beth Tolentino.
Manny Villar and daughter Camille with Willie Revillame
Sigurado na ang pagbubukas ng AMBS bago matapos ang 2022, pero may posibilidad na baguhin at gawing ABS (All Broadcasting System) ang pangalan ng TV network na mapapanood sa Channel 2, ang dating frequency na gamit ng ABS-CBN.
Read: Congress junks ABS-CBN franchise renewal
Malaki ang magiging partisipasyon ni Willie sa pamamahala sa bubuksang network kaya ipinagkatiwala sa kanya ni Villar ang pag-iisip ng mga concept para sa programming ng AMBS o ABS.
Kabilang si Willie sa mga magdedesisyon sa mga programang ilalagay at sa mga artistang kukunin ng network.
Bago naging panghapong programa sa TV5 (Wowowillie) at GMA-7 (Wowowin) ang mga defunct top-rating game show ni Willie, pangtanghali ang sinusubaybayang TV show niya noon sa ABS-CBN, ang Wowowee, na napanood mula February 5, 2005 hanggang July 30, 2010.
Read: Wowowee co-hosts bid a tearful farewell sans Willie Revillame
May mga haka-hakang malaki ang tsansang bumalik at magkaroon si Willie ng noontime show sa dating timeslot ng Wowowee sa ABS-CBN kapag nagbukas na ang bagong home network niya.
Hindi lamang ang pag-aayos sa programming ng AMBS or ABS ang topic ng meeting nina Villar at Willie.
Ang pinakamalaking balita, nabili na ng billionaire businessman—si Villar ang richest man sa Pilipinas sa World’s Billionaire’s List for 2022 ng Forbes—ang transmitter ng ABS-CBN sa Luzon at pinag-uusapan na ang pagbili ng kanyang kompanya sa mga transmitter ng Kapamilya Network sa Visayas at Mindanao.