Bumalik na si Arci Muñoz mula sa kanyang matagal na pamamalagi sa Amerika kaya aktibo na siya muli sa pangangampanya para sa kandidatura niya bilang konsehal ng Cainta, Rizal.
Tumatakbo siya sa ilalim ng partido ng mayoralty aspirant at former PBA player na si Alvin Patrimonio.
Sa interbyu ni Mario Dumaual ng ABS-CBN News, sinabi ni Arci na hindi ito si Darna pero may magagawa siya sa kanilang bayan.
"Hindi po ako si Darna, pero ako po ay isang sergeant at trained reservist ng Philippines Air Force. May magagawa po ako para ma-obtain ang peace and order sa Cainta at at magiging boses ako ng lahat ng kababaihan!" ang pahayag ni Arci sa ABS-CBN News.
Marami sa kanyang mga kababayan sa Cainta ang nagulat na tuloy pala ang kandidatura ni Arci bilang konsehal dahil matagal na hindi siya nasilayan sa kanilang lugar na nais niya na paglingkuran.
Ayon sa mga residente ng Cainta, mas nakikita pa nila na nanonood si Arci sa U.S. concert ng sikat na Korean boy band na BTS, nagpapalitrato na kasama ang popular television host na si James Corden, bumibiyahe sa iba’t ibang states ng Amerika.
Ang mga social media post ng singer-actress ang kanilang pinanghahawakan na ebidensya.
READ: Arci Munoz is the ultimate fangirl at BTS Las Vegas concert
May mga nagkomento naman na baka raw hindi lamang namukhaan si Arci ng mga mamamayan ng Cainta sa tuwing nag-iikot siya sa kanilang bayan dahil lalong gumanda ang kanyang hitsura, na malaki na ang ipinagbago mula nang magsimula ang showbiz career niya.
Hindi naman itinatanggi ni Arci na matagal siya na nawala sa Pilipinas. Aminado si Arci na tatlong rallies/caucuses ng kanilang partido ang hindi niya napuntahan dahil sa kanyang pananatili sa ibang bansa.
Kaya bumabawi siya sa mga huling araw ng kampanya bago maganap ang halalan sa darating na Lunes, May 9, 2022.