Salat sa katotohanan ang balitang tuluyan nang nag-migrate sa Amerika si Ai-Ai Delas Alas.
Ang pakay ng paglipad niya noong November 2021 ay para manamnam niya ang kanyang green card na 2015 pa niya nakuha. Gusto rin niyang mai-petition ang asawang si Gerald Sibayan.
May permiso ng GMA Network ang kanyang biyahe.
At hindi magtatagal ang pananatili ng komedyana sa Amerika dahil malapit nang magsimula ang taping ng bagong drama series ng Kapuso Network na pagbibidahan niya at ng love team nina Shayne Sava at Abdul Raman.
Raising Mamay ang working title ng upcoming show na nagkaroon ng Zoom story conference nitong Sabado ng hapon, February 12, 2022.
Kasama ni Ai-Ai sa nasabing Zoom story sina Valerie Concepcion, Ina Feleo, Joyce Ching, at ang direktor na si Don Michael Perez.
Excited ang 57-year-old star sa nalalapit na lock-in taping ng Raising Mamay dahil gustung-gusto niya ang karakter na kanyang gagampanan.
Malayung-malayo raw ito sa kanyang mga nakaraang role sa iba’t-ibang mga teleserye at pelikula.
Bilang paghahanda sa papel ni Mamay, naghahanap si Ai-Ai ng batang may edad na anim hanggang pitong taon na kailangan niyang makasama, maging kaibigan, at mapag-aaralan ang karakter.
Mahigit na tatlong dekada na ang acting career ni Ai-Ai, pero parang baguhan ang pakiramdam niya dahil sa kakaiba, mapaghamon, at maipagmamalaki na papel na ipinagkatiwala sa kanya ng GMA-7.
"Maganda pero mahirap ang role ko sa Raising Mamay. Kailangan ko na galingan,” ang sabi ni Ai-Ai na matagal nang napatunayan na bukod sa husay sa comedy, magaling rin siyang dramatic actress at pruweba ang mga international acting award na kanyang napanalunan para sa School Service ( 2019 ) at Area ( 2017).