Hindi naniniwala si Senator Bong Revilla, Jr. na mawawala na ang mga action movie at ginamit niyang basehan ang mga tunay na pangyayari noong dekada ’70 na ikinuwento ng kanyang ama, ang namayapang aktor na si Ramon Revilla, Sr.
“Action films will always be there. Mawawala iyan for a while pero babalik iyan. Maski noong panahon ng '70s, ikinukuwento ng tatay ko [Ramon Revilla, Sr.] at ni FPJ [Fernando Poe, Jr.], nung pumasok yung bold movies, nawala yung action films pero bumalik pa rin.
“So, action films like sa television, ngayon, mas in yung television, babalik at babalik iyan. Tayo naman hangga’t nandirito tayo, kaya pa natin umaksyon, gagawa tayo ng magagandang aksyon para hindi mawala ito,” paliwanag ni Bong nang tanungin siya tungkol sa kapalaran ng action movies sa naganap na virtual mediacon ng Season 2 ng Agimat ng Agila ngayong Linggo ng hapon, Enero 23.
Magbabalik at muling mapapanood sa GMA-7 ang sequel ng Agimat ng Agila dahil tinangkilik ng televiewers ang Book 1 ng comeback project ni Bong sa telebisyon, matapos ang halos walong taong pagpapahinga mula sa pag-arte.
Pinaghandaan ni Bong ang Season 2 ng Agimat ng Agila sa pamamagitan ng pagbabawas ng timbang at araw-araw na ehersisyo para sa mga death-defying action stunt na siya mismo ang gumawa.
“I’m very proud of this project at magagaling talaga yung mga kasamahan ko.
“Talagang nagpakundisyon ako physically at siyempre, we’re not getting any younger. Mga bata itong mga kasabay ko, so kailangan magpakitang-gilas din tayo.
“I work out almost every day. I do my boxing and kick boxing. Pati yung mga rolling-rolling na iyan, pagulong-pagulong, nandoon pa rin yung training.
“Hindi tayo puwedeng kumawala diyan kasi lalo na sa mga ginagawa nating action scenes," ang kuwento ni Bong na nagbiro na 35-years-old ang kanyang pakiramdam.
Binanggit ni Bong na makikita ng televiewers sa Season 2 ng Agimat ng Agila ang pagkakaiba ng kanyang physical appearance sa unang season ng drama action fantasy series na pinagbibidahan niya.