Nakarating na sina Marian Rivera at Dingdong Dantes sa Tel Aviv, Israel.
Ito ang agad na ipinaalam ng aktres sa kanyang mga tagahangang ipinagbubunyi ang pagkakapili sa kanya ng Miss Universe Organization bilang miyembro ng selection committee ng 70th Miss Universe.
Gaganapin ang grand coronation ng Miss Universe 2021 sa Eilat, Israel sa December 12 (December 13, Philippine time).
Hindi lamang ang Dantes couple ang bumiyahe sa Israel kagabi, December 6, dahil naroroon na rin si Miss Universe Philippines Organization National Director Shamcey Supsup at ang asawa nitong si Lloyd Lee.
Kahapon, December 6, din ang flight nila papunta sa host country ng 70th Miss Universe.
Ito ang pangalawang pagkakataong umalis ng bansa si Shamcey habang may pandemya para suportahan ang kandidata ng Pilipinas sa Miss Universe.
Noong May 2021, lumipad si Shamcey sa Florida, USA bilang suporta kay Rabiya Mateo, ang Philippine delegate sa 69th Miss Universe.
Hindi lamang sina Marian, Dingdong, Shamcey, at Lloyd ang bumiyahe sa Israel para sa Miss Universe 2021.
Nauna nang umalis noong November 27 si Miss Universe Philippines Creative Director Jonas Gaffud at at si Miss Universe Philippines Director of Communications Voltaire Tayag.
Kasabay nina Gaffud at Tayag sa pagpunta sa Israel si Miss Universe Philippines 2021 Beatrice Luigi Gomez.
Hindi pa opisyal na inilalabas ng Miss Universe Organization ang listahan ng mga makakasama ni Marian sa selection committee ng 70th Miss Universe. Pero may nagsasabing kabilang ang popular Filipino-American make-up artist at YouTuber na si Patrick Starrr at si Miss Universe 2016 Iris Mittenaere.
Kung totoong magiging miyembro rin ng selection committee ng 70th Miss Universe sina Patrick at Iris, lalong may dahilan para maging komportable si Marian sa mga responsibilidad nito sa kanyang unang international beauty pageant stint dahil may Filipino connection ang dalawa.
Malapit sa puso ni Iris ang mga Pilipino at habambuhay na hindi niya malilimutan ang Pilipinas dahil dito siya kinoronahan bilang Miss Universe noong January 30, 2017.
Ipinagmamalaki naman ni Starrr (Patrick Simondac sa tunay na buhay) ang pagiging Pinoy nito.
Use these Klook promo codes when you shop or order online. Marami pang ibang coupons dito.