Sa paglipat ni Lovi Poe sa Kapamilya Channel, binansagan siyang Precious Jewel.
Sa mainit na pagsalubong sa kanya ngayong Linggo ng tanghali, September 19, 2021, sa ASAP Natin ‘To, naisantabi na ang dati niyang titulo sa GMA-7 na Primera Aktresa.
Mangiyak-ngiyak si Lovi habang pinapanood nito ang pre-recorded welcome messages nina Iza Calzado, Janine Gutierrez, Paulo Avelino, Sunshine Dizon at Ogie Alcasid—na mga dati niyang kasamahan sa Kapuso network na nauna nang lumipat sa Kapamilya Network.
Nagbigay din ng mensahe para kay Lovi sina Coco Martin, Piolo Pascual, at Martin Nievera—na naging bahagi ng mga GMA-7 shows noon bago sila naging mga contract star ng ABS-CBN.
Ikinagulat at ikinatuwa nang husto ni Lovi ang hindi niya inaasahang congratulatory message ng kanyang half-sister, si Senator Grace Poe.
Sabi ng senadora, tiyak na ipinagmamalaki ng kanilang ama na si Fernando Poe Jr. ang 32-year-old actress.
"Congratulations, dear Lovi, I’m sure Papa’s very proud of you. My special wish is that, actually, you make an action film. Kayang-kaya mo kasi disiplinado ka, very fit, at alam ko, magaling ka rin sumuntok.
"In my heart, you’re always pamilya. Continue to make us proud, I love you, Lovi,” ang mensahe ni Grace para sa kanyang kapatid sa ama.
Nakasama ni Lovi sina Gary Valenciano at Erik Santos sa kanyang song number na "L-O-V-E."
Pagkatapos nito, tinanong siya ni Erik tungkol sa kahalagahan ng pagiging Kapamilya niya.
Ang sagot ni Lovi, "I think it’s the essence of feeling at home wherever you are, kahit saan pa man parte ng mundo, yung hindi ka nag-iisa at meron kang Kapamilya."
