Si Reiven Umali ng Carmona, Cavite ang tinanghal na grand champion sa Huling Tapatan ng "Tawag ng Tanghalan" Season 5 ng It’s Showtime ng Kapamilya Channel na naganap ngayong Sabado, September 18, 2021.
Napaluha si Reiven sa announcement ng kanyang pangalan bilang winner ng Season 5 ng sikat na singing competition ng It’s Showtime na nag-umpisa noong February 8 pero isang buwang nahinto nang ideklara ang Enhanced Community Quarantine sa National Capital Region mula March 18 hanggang April 10, 2021.
Isang milyong piso, house and lot na nagkakahalaga ng P2.3 million, talent management contract sa Polaris ng Star Magic, recording contract sa ABS-CBN Music at trophy na nilikha ng visual artist na si Toym Imao ang mga premyo na napanalunan ni Reiven.
Si Reiven ang nagwagi dahil siya ang tumanggap ng pinakamataas na puntos o total average na 92.78% sa pinagsamang boto ng mga hurado at text votes ng televiewers.
Second runner-up naman si Adrian Manibale ng Parañaque City na nakakuha ng 53.24% na boto at nanalo ng P200,000 cash prize, samantalang 3rd runner-up (52.07%) si Anthony Castillo ng Quezon City na may premyo na P100,000.
Apat na oras na tumagal ang Huling Tapatan ng Season 5 ng "Tawag ng Tanghalan" na tinutukan ng mga manonood kaya number one trending sa Twitter Philippines at number three naman si Reiven na popular sa kanyang millennial fans.