"New face" ang caption ng Thai Internet sensation na si Mader Sitang sa unang larawang inilagay niya sa kanyang Instagram account, dalawang linggo matapos niyang sumailalim sa cosmetic surgery procedure sa Lelux Hospital, Nonthaburi, Thailand.
Inilantad ni Mader Sitang sa publiko ngayong Martes, June 22, ang bagong hitsura niya na resulta ng matagumpay na operasyon.
Nawala ang mga kulubot sa mukha ni Mader Sitang, bumata ng ilang taon ang kanyang hitsura at natupad ang pangarap niyang V-shaped face. Pero halata pa rin ang pamamaga nito.
Biktima si Mader Sitang ng bullying noong kabataan niya dahil sa kanyang physical appearance, at isa ito sa mga dahilan kaya nagpaayos siya ng mukha.
Sa kabila ng matagumpay na cosmetic surgery kay Mader Sitang, nakakatikim pa rin ito ng mga panglilibak.
“Evolution of a Java man” ang tawag ng ibang mapanglait sa transformation niya.
Sumikat si Mader Sitang dahil sa kanyang signature hair-flipping dance moves na pumatok sa iba’t ibang bansa sa Asia, pati na sa Pilipinas, kaya pinaunlakan niya ang imbitasyong bumisita sa ating bansa noong October 2018.
Sadly, hindi na masisilayan nang personal ng Filipino fans ni Mader Sitang ang bagong mukha nito dahil diumano, blacklisted na siya sa Pilipinas.
Ang businessman na si Wilbert Tolentino ang humiling sa Bureau of Immigration and Deportation na ideklarang persona non grata ang popular Thai transgender woman dahil hindi nito iginalang ang kanilang napagkasunduang kontrata.
Si Tolentino ang nagdala kay Mader Sitang sa Pilipinas noong 2018, at siya ang tumatayong business manager.
Pero nasira ang kanilang relasyon dahil sa milyun-milyong pisong talent fee na hinihingi ng Thai Internet sensation.
Sa interbyu kay Tolentino noong November 2018, inamin niyang isa siya sa mga niloko at napaniwala ni Mader Sitang na abogado ito at tumulong sa mga nasalanta ni Typhoon Yolanda noong November 2013.