Matunog ang balitang pagkatapos ni Sunshine Dizon, si Lovi Poe ang susunod na Kapuso star na lilipat sa ABS-CBN.
Kinumpirma ng isang nakakaalam sa tunay na kuwento na may alok na project ang ABS-CBN kay Lovi, at may posibilidad na tanggapin niya ito.
Kung sakaling tanggapin ni Lovi ang alok ng ABS-CBN, ang Owe My Love ang huling TV assignment niya sa GMA-7.
Hindi magkakaroon ng conflict sa kanyang paglipat dahil malapit nang matapos ang nabanggit na drama romantic comedy series.
Natapos noong July 2020 ang three-year exclusive contract ni Lovi sa GMA Network kaya malaya na siyang makalipat sa ibang TV network.
Nag-renew si Lovi ng kontrata sa home network niya noong July 26, 2016.
Sa panayam sa kanya, ito ang naging pahayag niya: “GMA has always been my home, and I’m just happy po na nandito ako ngayon signing a contract with my network.
“Nagpapasalamat ako dahil palagi nila akong binibigyan ng opportunity to actually work on what I’m really passionate about, which is acting and performing in front of the people who are supportive.”
Magkakaroon ng press conference si Lovi sa susunod na linggo.
Hinihintay ito dahil baka magsalita ang actress-singer tungkol sa balitang iiwanan na niya ang network na nagbigay sa kanya ng malaking break sa telebisyon noong 17 years old pa lamang siya.
Si Leo Dominguez ng LVD Artist Management ang namamahala sa showbiz career ni Lovi.
Kung matutuloy ang paglipat ng aktres sa Kapamilya Network, makakasama na niya ang ibang mga talent ng LVD na sina Paulo Avelino, JC de Vera, at Janine Gutierrez.