Humahataw sa Netflix ang Regal Entertainment, Inc. dahil hindi nawawala sa listahan ng Top 10 Movies in the Philippines ng nabanggit na streaming service ang mga pelikulang iprinodyus ng film outfit ng mag-inang Lily at Roselle Monteverde.
Ngayong Lunes, February 1, ang Woke Up Like This ang No. 4 at ang Our Mighty Yaya ang No. 5 sa listahan ng Netflix na Top 10 Movies in the Philippines.
Ang Woke Up Like This ang comedy movie nina Vhong Navarro at Lovi Poe.
Tungkol ito sa isang basketball player at isang sikat na modelo na hindi inaasahang nag-swap ang kanilang katawan pagkatapos nilang magdiwang ng kanilang kaarawan. Ipinalabas iyon noong August 23, 2017.
Ang Our Mighty Yaya ang pelikulang pinagbidahan ni Ai-Ai delas Alas tungkol sa isang super tagapag-alaga ng dalawang sutil na magkapatid.
Mapapamahal sila sa isa't isa matapos ang mga kuwela nilang mga karanasan na tiyak na magbibigay inspirasyon sa mga manonood. Iyon ang Mother’s Day presentation ng Regal noong May 10, 2017.
Parehong moneymaker ang mga nasabing pelikula dahil pinilahan ito sa box office nang i-release sa local movie houses.
Popular sa young Netflix viewers, na may edad 8 hanggang 11 years old, ang Our Mighty Yaya at ang Woke Up Like This dahil bentang-benta sa kanila ang mga nakakatawang eksena.
Ito marahil ang rason kaya ilang araw nang nasa listahan ng Top 10 Movies in the Philippines ang mga comedy movie nina Ai-Ai at Vhong-Lovi.
MORE REGAL ENTERTAINMENT MOVIES ON NETFLIX
Noong January 2021, hindi rin nawala sa Top 10 Movies ng Netflix ang The Heiress (Maricel Soriano and Janella Salvador), The Hopeful Romantic (Pepe Herrera and Ritz Azul), at Unli Life (Vhong Navarro at Winwyn Marquez).
Pasok din ang My 2 Mommies (Paolo Ballesteros, Solenn Heussaff, at Maricel Soriano) at Ang Henerasyong Sumuko sa Love (Tony Labrusca, Jane Oineza, Albie Casiño, Jerome Ponce, at Myrte Sarrosa).
Hindi masyadong tinangkilik ng moviegoers ang Ang Henerasyong Sumuko sa Love nang ipalabas ito sa mga sinehan noong October 2, 2019.
Pero tulad ng kapalaran ng Through Night and Day nina Paolo Contis at Alessandra de Rossi, sinuportahan, pinanood, at naging popular sa Netflix viewers ang youth-oriented movie ng direktor na si Jason Paul Laxamana.
