Double victory ang nakamit ng Thailand sa world finals ng 1st Global Asian Model na ginanap sa The Cove ng Okada Manila kagabi, November 21.
Ang male and female representatives ng naturang bansa ang nagwagi.
Itinanghal na 1st Male Global Asian Model 2019 si Falco Somnarin na pinakamatangkad sa lahat ng male contestants, at 1st Female Global Asian Model 2019 si Artittaya Promchart.
As expected, crowd favorites ang Philippine bets na sina Ella Lubag at Vince Marcelo, pero nabigo silang makuha ang coveted titles.
First runner-up si Ella sa female category ng 1st GLAM, samantalang third runner-up si Vince.
Si Alexander Tomohiro ng Japan ang first runner-up sa male category, second runner-up si Luke Pereira ng Japan, at fourth runner-up si Tran Quang Thang ng Vietnam.
Sa female category, second runner-up si Runa Matsui ng Japan, third runner-up si Anyssa Mendez ng Amerika, at fourth runner-up si My Duyen ng Vietnam.
Ang Global Asian Models o GLAM ang katuparan ng pangarap ni Jonas Gaffud na magkaroon ng international modeling competition para sa aspiring models na may Asian Heritage.
Tatlumpo’t walo mula sa iba’t ibang bansa ang bilang ng mga lumahok sa GLAM.
Guaranteed modeling contracts at US$10,000 each ang ilan sa mga premyo na natanggap nina Falco at Artittaya, na isang taonng mananatili sa Pilipinas dahil ito ang kanilang magiging official headquarters.
Judges ng 1st Global Asian Models sina Kevin Ipalari, Diego Harmuch, Rey Ilagan, Francis Arden Enriquz, at RS Francisco ng Frontrow, ang major presentor ng world finals night.
Special guest si Miss Universe Singapore Mohana Prabha at Miss Universe Singapore 2011 Valerie Lim na batchmate ni Shamcey Supsup sa 60th edition ng Miss Universe.
Si Lim ang may ideya na imbitahan si Jonas para maging creative consultant ng Miss Universe Singapore 2019.
Naririto sa Pilipinas si Mohana dahil tinutulungan siya ni Jonas para sa training niya sa 68th Miss Universe na magaganap sa December 8, 2019 sa Atlanta, Georgia, USA.