Sa kauna-unahang pagkakataon, kinumpirma ni Carlo Aquino na "totoo" ang kumalat niyang litrato kasama ang isang non-showbiz girl.
Kaugnay ito ng naglabasang photos ni Carlo kasama ang isang nagngangalang Trina Candaza habang nakasakay sila sa jet ski sa La Union noong January 2019.
Binasag ni Carlo ang kanyang katahimikan hinggil sa isyu sa ulat ng entertainment reporter na si MJ Felipe sa ABS-CBN News Online kagabi, February 27.
Pero hindi nagdetalye si Carlo kung ano ang eksaktong ugnayan nila ng naturang non-showbiz girl.
Aniya, "Naniniwala kasi ako na may ibang mga bagay na kailangan mong kini-keep private, para kaya mong tumayo in private. Ganun na lang yung ginagawa ko."
Aminado si Carlo na umalma ang ilang CarGel—Carlo at Angelica—fans nang mamataang may kasama siyang non-showbiz girl.
Marami umano ang umasang nagkakamabutihang muli si Carlo at ex-girlfriend nitong si Angelica Panganiban, lalo na nang magbalik-tambalan sila sa pelikula noong September 2018.
Noong January 2019 ay tatlong magkakahiwalay na okasyon nakunan ng litrato si Carlo at si Trina.
Hindi nakaligtas sa mapanuring netizens na bukod sa pagpunta nila sa La Union ay nakita rin ang dalawa na kumakain sa isang restaurant sa Makati, at sinasabing nagkita rin sila sa isang foot spa/salon noong buwan ding iyon.
Pero sa kabila ng pagkakasangkot ni Carlo sa isang non-showbiz girl, nanindigan ang binatang mas mabuting hayaan na lang niya kung anuman ang opinyon ng ibang tao.