Nagpadala ng bulaklak si Coco Martin sa burol ni Kristofer King nitong Pebrero 25, Lunes ng umaga, sa Rizal Funeral Homes, Cementina St., Pasay City (malapit sa Libertad).
Kuwento ng asawa ni Kristofer na si Joan "Nikki" Alegre Reyes kinagabihan nang makausap ko, bilang contributor ng PEP.ph (Philippine Entertainment Portal), “Natutulog kasi ako sa kuwarto... mga one hour pa lang ang tulog ko. Bandang 7 to 8 A.M., ginising ako.
“Hinahanap daw ako. ‘Ate, may naghahanap sa ‘yo. Nagbigay ng bulaklak si Coco.’
“Nagmadali ako. Nakita ko, pangalan niya. Nabuhayan ako ng loob.
“Hindi ko masyadong inaasahan si Coco. Kasi, busy siya. Alam kong bising-busy ang taong ‘yan, e...”
Pasado 10 P.M., ipu-phone patch na sana si Nikki ng DZRH radio program na Showbiz Talk Ganern nang dumating si Coco kasama si Direk Brillante Mendoza.
Nag-usap nang masinsinan sina Coco at Nikki sa harap ng kabaong ni Kristofer.
Kalung-kalong ni Nikki ang bunso niyang babae, at kinakala-kalabit pa siya ng ibang mga anak.
Nasaksihan ko ang pagdalusdos ng masaganang luha ni Nikki habang nag-uusap sila ni Coco.
Nagtagal pa si Coco sa burol. Nagpaubaya ito sa mga gustong magpalitrato. Ang bunso ni Kristofer ay kumandong pa sa aktor.
Mag-a-alas onse na nang umalis ang grupo nina Coco at Direk Brillante.
Doon ko itinuloy ang interbyu kay Nikki, na tila nabunutan ng malalaking tinik sa dibdib.
Napapaluha pa rin si Nikki pero napapangiti sa pagsasalaysay:
“Nang dumating siya kanina, 'Wow... parang... ano ba ito? Inutusan ba ito ng Diyos?' Dumating siya, napaiyak na ako.
“Hindi ko alam ang gagawin ko. Tuwang-tuwa ako... Andito na siya sa harap ng kabaong ng asawa ko.
“Tinatanong na niya ako, 'Magkano lahat ang babayaran? Ano ang nangyari? Bakit namatay siya? Bakit biglaan?'
“Sinabi ko naman lahat-lahat sa kanya."
Patuloy ng misis ni Kristofer, “Tapos, sabi niya sa akin, ‘Sige, sagot ko na lahat.’
“Diyos ko po! Para na akong binagsakan ng langit at lupa!
“Sabi ko sa kanya, ‘Buti, nakaharap kita. Kasi, gusto kong humingi ng tulong sa ‘yo. Kasi alam ko, pag ikaw, isang pitik lang, OK na.’
“Sabi niya, ‘OK na. Sige, ako na.’”
Hopefully, sa Pebrero 27, Miyerkules, ay makuha na ni Nikki ang death certificate ni Kristofer sa Adventist Medical Center Manila, Pasay City.
Tuloy na ang libing ni Kristofer sa Linggo ng umaga, Marso 3, sa tabi ng puntod ng mama nito sa Manila Memorial Park, Sucat, Parañaque City.
