Umulan ng hiyawan at tuksuhan nang abutan ng bouquet of flowers ng PBA player na si Calvin “The Beast” Abueva si Vice Ganda sa isang ginanap na pageant sa Pampanga nitong December 10, Lunes ng gabi.
Sa Instagram video na in-upload ng isang netizen (@jaaahzz), mapapanood na habang nagbibigay ng “thank you” speech si Vice, biglang lumapit si Calvin at inabutan ng bulaklak ang nagulat na si Vice Ganda.
Bahagyang inilapit ni Calvin ang kanyang mukha kay Vice na tila hahalikan pero hindi naman itinuloy.
Hinawakan naman ni Vice ang mukha ng basketbolista, at maririnig ang malakas na hiwayan ng mga tao.
Mapapanood din na ikinatuwa ng mga hosts ng pageant ang nasaksihan.
Dumalo bilang guests sina Vice at Calvin sa Mutya Ning Kapampangan 2018 na ginanap sa at Bren Z. Guiao Convention Center sa San Fernando, Pampanga, gabi ng Lunes.
Nagsimulang ma-link sina Vice at Calvin mula pa noong September nang lumabas sa social media ang kanilang mga larawang magkasama.
Maging sa kanyang social media accounts, may Instagram Stories si Vice na nakakasama niya si Calvin.
Ipinahayag naman ni Vice sa kanyang interviews na masaya siya sa pagkakaibigan nila ni Calvin, dahil hindi itinatago at hindi ikinahihiya ni Calvin ang kanilang pagkakaibigan.